U·IATTIMGIPAONI
SHILLONG: A·doko MHIS aro PMJAY-ko man·na kragipa ge 6,92,979 nokdangrangko biming segataha ine Health Minister Ampareen Lyngdoh Mongolbaro House-na parakataha.
Kan·dikgipa chanchirimaniko dakmitingo sing·anirangna aganchakengon, 2022-2023 bilsio Gong 1,62,20,61,387 tangka paisarangko financial institution-rangna Sorkari gamaha, jeon 2023-2024 bilsio Gong 1,78,43,87,175 tangkarangko gamaha ine Health Minister aganchakaha.
Ma Lyngdoh-ni aganani gitade, 2022-23 bilsio a·kange tangka bi·aniara Gong 198,54,08,098 ong·achim, unaskange package-rangara 2,264 ong·achim, uko da·ode 2,253-ona bariaha.
Dakkianiko dakanio Reliance GI seokako man·aha ine aganengon, a·dokni a·palogipa Hospitalrangba ia scheme-ni ning·o 3758 a·kanggiparang donga, Lyngdoh agandapaha.
Ia scheme-na Aadhaar-ko link ka·na nangchongmota aro Aadhaar aro MHIS PMJAY-ko link ka·aniko dakna gita dingtang dingtang District Administration-rang an·tangtangni bil ama gita kamrangko ka·enga, Health Minister aganaha.
Una skang, ia scheme-ni ning·o bang·bata sabisirangko sana bananikon man·chapatna nanga, aroba Hospitalrang ia scheme-ko maidake jakkalenga, unaba Sorkari mikrakna nanga ine House-o chanchigrikmitingo Nongpoh MLA Mayralborn Syiem aganahachim.
