U·IATTIMGIPAONI
SHILLONG: Lok Sabha aro Assembly Legislative seat-rango me·chikrangna 33 percent seat-rangko donna sienggipa Women’s Reservation Bill-ko Mongolbar salo, Union Cabinet-ni pass ka·aniara me·chikrangko mangrakbatatna ja·ku de·chakatani ong·enga ine Meghalaya a·dokni saksakamkam me·chik Cabinet Minister Ampareen Lyngdoh parakataha.
Women’s Reservation Bill-ko Union Cabinet-ni pass ka·ahani gimin an·tangni kusi ong·aniko parakatengon, ia Bill-ko ma·mong sorkari ta·raken niamo ong·atgenma ine Lyngdoh sing·doatskaaha.
“A·songni me·chikrangko mangrakbatatna gita ia ja·kuko de·chakatahani gimin anga a·songni Prime Minister Narendra Modi aro uni Cabinet minister-rangko mittelpilna ska,” ine Lyngdoh aganaha.
Women’s Reservation Bill be·en pil·ahaode da·o changgipin Assembly-o komibeoba sak 23 me·chikrang donggnok ine janapatengon, Assembly-o me·chikrangko mande ra·na gita sak 23 me·asa politician-rangde biaptangtangko wate on·na nanggnok ine Lyngdoh parakataha.
Assembly-o asonge, a·dokni nangchongmotgipa kamrangni bidingo jera ra·grikna gita da·o me·chikrangba Assembly-o seokako man·na gita an·tangtangko da·onin tarisamsona nanggnok ine a·dokni saksakamkam me·chik Cabinet Minister parakataha.
“Ian da·o me·chikrangko chakate an·tangtangko tarisamsona gita okamani ong·engaha. Parliament-ni gipin Bill-rango gitan ia Bill-ko dingtang dingtang a·dokrangni ra·chakani 50 percent-san ong·genchimoba ia Bill chu·sokgipa ong·ani cholrang donga indiba da·o dipet anga an·tangba ia Bill-ni chu·gimik seanirangkode poraikuja,” ine Lyngdoh aganaha.
Women’s Reservation Bill-ko Union Cabinet-ni pass ka·ahani gimin Meghalaya a·dokni Chief Minister Conrad K Sangma-ba kusi ong·aniko parakataha aro Meghalaya a·dokara me·chikrangko skang dongipa a·dok ong·e, ua an·tangba me·chikrangna cholko on·chengna sikgipa mande ong·e da·alo ia Bill-ko pass ka·aniara a·dokni me·chikrangna namen dingtangmanchagipa sal ong·aha ine parakataha.
Ia Women’s Reservation Bill-ko pass ka·aniara Parliament aro Legislative Assembly-rango me·chikrangna cholrangko on·dapani gita ong·gnok ine janapatengon, iani bidingo National People’s Party (NPP)-ni gitaba uamang chanchirime resolution-ko pass ka·anggen aro ia Bill-ko niamo ong·atna gita ku·rangko on·anggen ine a·dokni Chief Minister aro NPP-ni national president parakataha.
Ia Bill-ko Union Minister Arjun Ram Meghwal, Parliament-o parakatna siengahachim ine nikna man·a.