U·IATTIMGIPAONI
SHILLONG: Bilsisa skang, pekatgipa samrangko badinganina New Delhi-o rim·ako man·gipa Mizoram a·dokni mande saksa baksa jak donga ine a·dokni Chief Minister Conrad K Sangma-ko matnangatani ja·man, mikkangchiba iandake ong·gija kamrangko ka·gipa manderangoni chel·e dongchina a·dokni Chief Minister-ko a·dokni gitcham chief minister aro Trinamool Congress (TMC) parliamentary party-ni dilgipa Mukul Sangma mikrakataniko on·angtaiaha.
Iani bidingo kobor ra·timgipa manderang baksa agangrikengon, a·songni songbadrango seanirango pangchakesa ua Chief Minister Conrad Sangma-ni kosako matnangahachim ine Mukul parakataha.
Pekatgipa samrangko badinganina rim·ako man·gipa mandeni bidingo da·o kachari mai raiko on·aha, uani bidingo talatchina gita Chief Minister Conrad Sangma-ni dabienggipana aganchakaniko on·angskaengon, ia sandianide uni (Mukul)-ni kam ong·ja aro ua chief minister an·tangan ia mandeni gimin aro uni case-ni gimin talbate am·sandina nanga ine TMC parliamentary party-ni dilgipa aganskaaha.
“Iano saksani kamsan ong·ja indiba Delhi-ni gipin manderangba jak donga. Uni gimin Chief Minister an·tangan ia kamrangni gimin am·sandina nanga. Angni aganenggipa kattarangni bidingo name ma·sina gita ua India sorkarina aro bilo ong·enggipa gipinrangnaba seatna man·aigen,” ine Mukul aganaha.
Ua maiko chief minister-na ku·pattie on·engachim, ramram manderang pilakan ma·sina man·aigen ineba ua aganaha.
Re·baenggipa bilsirangoba pekatgipa samrangchi nangchakeako man·gipa manderangde bang·kuaigen ine janapatengon, songsalo ia ong·enggipa obostara namen jajrengna nangenggipa kam ong·enga ine TMC-ni dilgipa parakataha.