U·IATTIMGIPAONI
SHILLONG: Meghalaya a·doko cancer saenggipa manderang, mongsongbate kangal cholgri manderang, sanna bananirangko ra·anio agre koros ong·jana gita sorkari korosrangko komiatna jotton ka·enga ine Bristibar salo, a·dokni Health Minister Ampareen Lyngdoh parakataha.
Meghalaya a·doko cancer sagiparang, sanna bananirangko ra·anio agre koros ong·dugana nange neng·nikanirangko chagrongna nangtokenga ine adita salrangna songbadrango seanina aganchakaniko on·angengon, cancer saenggipa manderang, OPD aro IPD damgnion sanna bananirangko ra·anio, surgery, radiation, chemotherapy, palliative care, laboratory service aro radiology service-rangko man·chape, pilak sanna bananirangon tangka paisarangko gamna nanggija indina sanna bananirangko ra·na man·na gita sorkari, Meghalaya Health Insurance Scheme (MHIS)-ni ning·oba dakchakanirangko on·enga ine Lyngdoh parakataha.
“Indake ong·genchimoba, ia scheme-ni ning·o man·chapgijagipa gital sanna banani cholrang aro niamrang donga. Sorkari hospital-rango man·enggipa pilak samrangkoba chinga saenggipa manderangna on·aha aro basakobarang Shillong Civil Hospital-o chemo-ni samrang bon·chenggenchimoba chinga MHIS gita samrangko on·na jotton ka·enga,” ine Lyngdoh aganaha.
Mitam BPL nokdangrangoni saenggipa manderang, jemangan Aadhar card-rang dongjachim, uandakgipa manderangna hospital-on Aadhar card-na biming segatanirangkoba dakenga ine janapatengon, uamangni Aadhar card-rangko man·kujaskal uamang, hospital-rango bon·changgipa samrangkode a·palrangoniko brena gita nangskaa ine Health Minister parakataha.
Aadhar card-ko tarimanahaode joljolan MHIS-na biming segate, saenggipa manderang, samrangko MHIS pharmacy-rangonikoba ra·na man·aigenok ineba ua aganaha.
