U·IATTIMGIPAONI
TURA: Garo Hills-ona Assam-oni broiler do·o wataniko dontongatani ja·man, Meghalaya sorkarini Veterinary department-ni ning·o agent dakenggipa manderang kragija dake tangka paisarangko gile ra·enga ine Tura-ni Broiler Chiken Wholesalers Association (BCWA) badi ka·doangaha.
Koborko on·ani gitade, ia manderang, Veterinary department-ni ge·etaniko man·aha ine pa·sikenba, North Garo Hills a·jani Bajengdoba police station sambao, do·o badinggiparangoniko tangka paisarangko gile ra·ahani a·sel Tura, Williamnagar aro Rongram-oni West aro East Garo Hills a·jarangona broiler-rangko salruraanio neng·nikanirangko chagrongna nangtokahani gimin association-ni gita Bajengdoba Police Station-na badi ka·dongahachim indiba da·onan maming aganchakanirangko man·skakujaengachim.
Indake ong·engon, re·anggipa September-ni 21 tariko, Broiler do·orangko wholesale palenggipa dolsa manderang, West Garo Hills a·jani Deputy Commissioner Jagdish Chelani-ko gronge, iani bidingo dingtangmancha badi ka·e sedogipa chittikoba on·angaha.
Koborko on·ani gitade, Veterinary department-ni gita Ri Bhoi aro Khasi Hills a·jarangko man·chape Assam aro Meghalaya a·dokni simarango checkpoint-rangko donchina ge·etaniko on·ataha indiba ia ge·etanio manderangni bostu salruraanirangko champengchina gitade ge·etani dongskajachim.
Ia check point-rango niam gri tangka paisarangko gile ra·ahani a·sel Assam-oni Garo Hills-ona broiler do·orangko supply ka·giparangba dontongataha aro uandaken Tura, Rongram aro Williamnagar-o broiler badinggiparang neng·nikanirangko chagrongna nangskaengaha ine u·iataha.
BCWA-ni u·iatani gitade, Assam-oni broiler salbaenggipa garirangoniko ia manderang, trip-prakon gong 20,000-mang dabie ra·ahani a·sel da·o Garo Hills-ona broiler ra·baaniko Assam-ni manderang dontongataha.
Garo Hills-o iandake broiler do·orangko man·jaengani a·selan damrang rakbatskaengaha aro uandaken ramram manderangsa neng·nikanirangko chagrongna nangtokengaha ineba association-ni dilgiparang, suk ong·gijaniko parakataha.
Iani bidingo West Garo Hills a·jani Deputy Commissioner, ta·raken ja·kurangko de·na ku·rachakaniko on·ataha.