U·IATTIMGIPAONI
SHILLONG: Saubhagya scheme-ni kamrangko ka·anio badiaba contractor-rangna mikkang nitee tangka paisarangko koros ka·ahani a·sel krorni kror tangkarang noksan ong·na gita nangaha ine Comptroller & Audit General (CAG)-ni report-o parakatani ja·man ia scheme-ni bidingo a·dok sorkari, mikkang antio chanchirimna tik ka·angaha.
Sombar salo, Power department-oni koborko on·ani gitade, Saubhagya scheme-ni kamrangko ka·anio ong·gija dakanirangko CAG-ni report-o parakahani gimin ia report-ni bidingo name nipiltaina gita Power department, mikkang antio tom·aniko ong·atna sienga.
Power department-ni dal·dalgipa officer-rang da·o dipet gipin biaprangosa ong·engani gimin department-ni tom·aniko mikkang antio ong·atna tik ka·angaha ineba u·iataha.
Batanggimin bilsirangonin Saubhagya scheme-ni kamrangko a·doko ka·anio ong·gija dakanirang donga ine matnanganirang dongahani gimin sorkari, iani bidingo gital dake sandirokanirangko dakna miksonganirang dongama ine sing·anina aganchakaniko on·angengon, iani bidingo baditaba bilsirangna skangan inquiry-ko dakahani gimin da·o dipet gital dake inquiry-ko dakna miksonganirangde dongja ine kobor on·timgiparang parakataha.
Cabinet secretary-oni ku·pattianirang donggenchimoba, Saubhagya scheme-ni kamrangko mitam contractor-rangna uamangni agangipa damrango on·ahani a·sel gong kror 156 tangkarang koros ong·na gita nangaha ine CAG-ni report-o parakahachim.
Saubhagya aro DDUGJY-ni ning·o gong kror 1.96-mangni gita tangka paisarangko mitam contractor-rangna gamaha ineba CAG-ni report-o parakahachim.
Indake ong·engon, CAG-ni report-na Opposition dolni dilgipa Ronnie V Lyngdoh, an·tangni suk ong·gijaniko parakatengon, CAG-ni report-ko on·ahani gimin nangchakegipa department-rangko talatchina gita Public Accounts Committee-an ge·etna nangachim aro ia committee-an nanga gita ja·kurangko de·na man·achim ine parakataha.
Da·o dipet iani bidingo gital dake inquiry-ko dakchina dabianirangba dongskakujaengachim.
