Lapangap songo ong·gipa a·selni bidingo DC-rang report-ko on·gen
U·IATTIMGIPAONI
SHILLONG: A·dok damgnini simarango ong·enggipa golmalrangni bidingo agangrikna gita da·al Sonibar salni bako, Assam aro Meghalaya a·dok damgnini chief minister-rang, Khanapara-o donggipa State Guest House-o tom·aniko ong·atenga aro ia tom·anio a·dok damgnini deputy commissioner-rang, adita salrangna skang, West Jaintia Hills a·jani Lapangap songo dolgni dinggrikgipani bidingo report-ko on·anggen.
“Lapangap songo dolgni dinggrikgipani gimin Sonibar salo, a·dok damgnini chief minister-rangni tom·anio chanchirimanggen. Da·o ia jolrango obostarang namangaha aro dolgnini gisepo dinggrikanirang dongjaha,” ine Sukrobar salo, Meghalaya a·dokni Deputy Chief Minister Sniawbhalang Dhar, kobor ra·timgiparangna aganaha.
A·dok damgnini sima jolo tom·tomaniko rakkina gita nirok sandianirangko dakenga ine talataniko on·angengon, ia jolrango nanga gita police-rangko donatmanaha aro nanggenchimode chel·chakgipa sipai dolrangko dondapatkugen ine Dhar parakataha.
Lapangap songde a·dok damgnini gisepo meligrikgijagipa biap ong·jani gimin mikkangchi ia jolrango iandake dolgnini gisepo dinggrikanirang ong·taijana gita mai dakgipa ja·kurangko de·gen, uko Sonibar salni bako a·dok damgnini chief minister-rang chanchirimanggen ineba a·dokni Deputy CM parakataha.
“Chingna Sonibar salo, a·ja damgnini deputy commissioner-rang report-ko on·anggen aro ia jolrango tom·tomaniko rakkiangna gita nangani kri ja·kurangko de·anggen,” ine Dhar aganaha.
Sima jolrango so·sojengjeng ong·ani somoirango Meghalaya Police-rang mamingkoba dakjaenga ine matnanggipani bidingo sing·anina aganchakaniko on·angskaengon, “Police-rangni kamko matnangna nangja maina uamang obostani krisa kamko ka·na nangenga. Uamangan an·chingna bate nambate ma·sigiparang ong·a aro iani a·selsa da·o obostarang namkalaha,” ine Dhar parakataha.
Batanggimin salgnina West Jaintia Hills a·jani Lapangap songo dolgni dinggrikaniara, bol chararangko ong·gija biapo ge·ani a·selsa ong·aha ine koborko on·ahachim.
Iani bidingo West Jaintia Hills aro West Karbi Anglong-ni district administration-rang tom·e chanchirimangani ja·man, meligrikna man·jaenggipa biaprango ge·gimin bol chararangko pikenba, dingtang biapo ge·skana gitaba tik ka·grikangaha.