U·IATTIMGIPAONI
TURA: Budbar salo, Tura-ni Durama College-o donggipa National Service Scheme (NSS), Tura Civil Hospital-ni Blood Bank, Meghalaya AIDS Control Society aro State Blood Transfusion Council baksa nangrime, National Voluntary Blood Donation Day-ko Tura-ni Rongkhon Megonggre-o donggipa Durama College-o maniangaha.
Ia salko manianio, Durama College-ni Principal K Nengminza, tom·anio bak ra·giparangna rimchaksoani kattarangko aganangaha aro Tura Civil Hospital Blood Bank-ni In-charge aro Senior Medical & Health Officer Dr (Mrs) TG Momin, Blood Donation Day-ni bidingo jinmana talate on·angskaaha.
An·chi on·gilaniara namgipa kam ong·e bang·en janggirangko jokatna gita man·a ine janapatengon, an·chi on·anichi an·chi ra·chakenggipa mandesan namgniko man·ja indiba ian an·chi on·gipanaba namgni ong·a ine Dr Momin parakataha.
Sakgipinna an·chi on·chakanian ua mandena nambatgipa boksis ong·a ine janapatskaengon, unit-sa an·chiko on·gilanichi an·ching mande sakgittamni janggiko jokatna man·gen ine Dr Momin parakataha.
Bon·kamao mittelpilani kattarangko Garo Department-ni Assistant Professor aro NSS-ni program officer Oliver D Sangma aganskaaha.
Ia program-o gimik sak 14 chatro chatrirang, an·tangtangni an·chirangko on·gilna gita re·batokahachim indiba uamangoni sakdoksan on·gilna gita man·aha aro uamangoniko gimik unit 6 an·chirangko man·aha.