U·IATTIMGIPAONI
TURA: South Garo Hills a·jani Chokpot jolo donggipa Budugre songo niam gri ro·ong bikotna Budugre Nokmani soiko tol·e ra·aha ine matnangenba FIR ka·aniko quarry nokgipa Alpha D Marak jegalatenba, ia ro·ong quarry-ko chalaina gita Nokma an·tangan 2018 bilsini October jao no objection certificate (NOC)-ko on·aha ine talataniko on·ataha.
Budugre songoniko niam gri ro·ong bikotna gita uni soi aro mohorko tol·e tariaha ine matnangenba, songni Nokma Analson R Sangma, ia quarry nokgipa Alpha D Marak-ni kosako FIR ka·doangahachim ine nikna man·a.
Indake ong·engon, an·tangni kosako matnange FIR ka·aniko quarry nokgipa jegalatskaenba, ia songoniko ro·ong bikotna gita ua Meghalaya Minor Mineral Concession Rule 2016-ni ning·o Mining Lease-ko man·aha aro Budugre songni Nokmani NOC baksana dingtang dingtang department-rangni permit-rangkoba ra·chengaha ine talataniko on·angskaaha.
“Ia ro·ong quarry-ko anga niam gri chalaienga ine matnanganiara kakket ong·ja aro maming pangchakani gri matnanganisan ong·aia maina MMCR 2016-ni ning·o Mining Lease baksana dingtang dingtang department-ni permit-rangko ra·chengesa anga ia quarry-ko chalaiaha. Ia quarry-na Nokma an·tangan NOC-ko 2018 bilsini October jao angna on·aha,” ine Marak parakataha.
A·a pattako tarina tol·gipa Nokma Document-ko jakkalaha ine matnanganina talataniko on·angskaengon, iana Cheran Maharini Chrarang aro mongsonggipa bakdrangrangan sakki ong·e, talatanirangko on·na man·aigen ine quarry nokgipa parakataha.