U·IATTIMGIPAONI
SHILLONG: Shillong songjinmani dam 44 gittimrango ringna jakkalenggipa chi ringna namgipa ong·ja ine Commissionerate of Food Safety-ni ning·o donggipa State Food Testing Laboratory-ni porikka ra·e nianio ma·sina man·ahani gimin ian sorkarini simsakgijani a·selsa ong·enga ine Voice of the People’s Party (VPP)-ni MLA Adelbert Nongum matnangatskaaha.
Shillong songjinmani dingtang dingtang gittimrango ringna jakkalenggipa chirangko porikka ra·e on·atahani gimin ua dingtangmancha Federation of Khasi Jaintia & Garo People (FKJGP)-koba mittelpilataha.
North Shillong-ni VPP MLA Adelbert Nongrum-ni parakatani gitade, manderangni ringna jakkalenggipa chirangara ringna namgipa ong·ama ong·ja uko nirokaniara a·dok sorkarini daitoan ong·achim indiba sorkarini gita maming nirok sandianirang dongjahani a·sel Shillong songjinmao songdongenggipa manderang indita bilsirangna chi namgijako ringna jakkaltokengachim.
Chi namgijako ringna on·engani gimin Shillong songjinmao songdongenggipa manderangko jegalgrimchina didiatengon, iandake chi namgijaniko on·anio sorkari official-rangan jak dongama ine Nongrum sing·doataha.
“Angni ma·siani gitade, chiko porikka ra·e nijringgipaba dongja, chi namama namja uko certify ka·na gita chief chemist-ba dongja aro chi pipe-rangko rongtalatjringaba dongja,” ine VPP MLA aganaha.
Shillong songjinmao songdongenggipa manderangna rongtalgipa chirangko on·na man·jahani gimin jak donggipa manderangni kosako rakgipa ja·kurangko de·china gitaba Nongrum didiataha.
Shillong songjinmao ringani chini gimin manderangni badi ka·anirangko man·e, re·anggipa August jani 22 tariko, Federation of Khasi Jaintia & Garo People (FKJGP) dol, Shillong songjinmani dam 46 gittimrango ringna jakkalenggipa chiko porikka ra·e gita Commissionerate of Food Safety-ni State Food Testing Laboratory-ona watatahachim.
Ia porikka ra·e niani report-ko parakatahaon, dam 46 gittimrangoni damgni, chong·motan Demthring aro Mawblei gittimrango ringna jakkalenggipa chirangsan ringna gita namaia indiba gipin dam 44 gittimrango ringna jakkalenggipa chirangna ringna gita namja ine ma·sina man·aha.
Report-o parakani gitade, ia dam 44 gittimrango ringna jakkalenggipa chio Coliform aro E. coli organism-rang baksana nangana bate iron aro gipin samrang dongani gimin Food Safety & Standards Authority of India (FSSAI)-ni dongimin niamo pangchake ringna namgipa ong·jachim.
FSSAI-ni dongimin niamo pangchake ringna namgipa chio 6.5-oni 8.5-ona pH value dongna gita nangachim aro 6.5-na komiahaode ua chiara acid donggipasa ong·aha ine FKJGP-ni dilgiparang parakataha.