U·IATTIMGIPAONI
SHILLONG: Ma·mongo aro Meghalaya a·dokoba Congress dol bon·roroangengahani gimin re·baenggipa 2024 bilsini Lok Sabha election-o Shillong Lok Sabha constituency-o gital MP-ko nikna man·gnok ine United Democratic Party (UDP)-ni general secretary Jemino Mawthoh, an·tangni ka·dongchakenganiko parakataha.
Shillong Parliamentary seat-ko batanggimin term gittamna kingking Congress dolni Vincent H Pala chee dongengani gimin ian Congress dolni jakkepenggipa constituency gitasa ong·engachim.
Indake ong·engon, skangosa Congress dol bilakgipa ong·achim indiba da·ode Meghalaya a·dokko man·chape pilak biaprangon bilgriangengaha ine UDP-ni dilgipa parakataha.
“2014 bilsiona kingkingde Congress kenna nanggnigipa aro bilakgipa dol ong·achim indiba Congress-ni gitcham dilgiparang pilakan da·o National People’s Party (NPP)-osa naptokjok,” ine Mawthoh aganaha.
Meghalaya a·doko bang·a manderangan Congress dolna chaktokachim indiba Congress dolni dilgiparang an·tangtangan doltangoni katenba, manderangko watgalaha ineba UDP-ni general secretary parakataha.
UDP-ara darangkoba mikkang nitegijagipa dol ong·ani gimin aro rakbee kamko ka·enggipa dol ong·ani gimin manderang, re·baenggipa bilsini Lok Sabha election-o UDP-ni candidate-kon seokgen ineba Mawthoh, an·tangni ka·dongchakenganiko parakataha.
