U·IATTIMGIPAONI
WILLIAMNAGAR: Garo Students Union (GSU) Eastern Zone (EZ)-ni election-o susaenggipa candidate-rangna dingtangmancha debate ba jera ra·susaaniko ong·atchina gita GSU-EZ-ni ning·o donggipa chatro chatrirang, ia election-na songe dongimin election commissioner-ko didiataha.
Election-o susaenggipa candidate-rangna jera ra·susaaniko ong·atchina didiatengon, “GSU-EZ-ni election-ko ong·atna siengahani gimin election-o susaenggipa candidate-rangni bidingo aro uamangni miksonganirangko chatro chatrirang ma·sie ra·na nangchongmota aro candidate-rangna jera ra·susaaniko ong·atanichi chatro chatrirang, election-o susaenggipa candidate-rangni bidingo nambate ma·sie ra·na man·gen,” ine GSU-EZ-ni ning·o donggipa chatro chatrirang parakataha.
Election-o susana miksongenggipa candidate-rang baksa chatro chatrirang agangrikmanaha aro uamang pilakan ia jera ra·susaanio bak ra·na skaniko paraktokaha ine janapatengon, election-o susaenggipa candidate-rangni choljokgipa tarik aro somoiko nigrike ia debate ba jera ra·susaaniko ong·atchina election-ni election commissioner-ko didiataha.
Ia jera ra·susaaniko ong·atanio pilak nanga dakchakanirangko on·na gita kusi ong·aigen ineba GSU-EZ-ni ning·o donggipa chatro chatrirang parakataha.
