U·IATTIMGIPAONI
SHILLONG: Meghalaya a·dokni pilak adhoc skulrangkon re·baenggipa 2024 bilsini April 30 tarikni gisepon deficit system-ona ra·dochina gita Federation of All School Teachers of Meghalaya (FASTOM), a·dok sorkario dabiangaha.
Adita salrangna skang, FASTOM-ni tom·aniko Nongstoin-o ong·atangenba, a·dokni pilak adhoc skulrangkon 2024 bilsini April 30 tarikni gisepon deficit gadangona ra·dochina gita sorkario dabina tik ka·angaha.
FASTOM-ni publicity secretary EG War-ni parakatani gitade, batanggimin bilsirangoni a·dokni adhoc skulrangko deficit-ni gadangona ra·dochina gita uamang dabitokengoba da·onan uamangni dabianiko sorkari knachakjaengani gimin sorkarina somoiko on·na tik ka·angaha.
“Chingni ia dabianiko dongimin somoi gita sorkari chu·sokate on·jagenchimode chinga sorokrangona re·ange dingtang dingtang dake jingjengatanggen,” ine War parakataha.
War-ni parakatani gitade, FASTOM-ni tom·bimonganiko ong·atanio adhoc skulrango skigiparang bang·en bakko ra·angtokaha aro ia tom·anio 2023 bilsioni 2026 bilsiona FASTOM-ni gital dilgiparangkoba seoke ra·chakangjolaha.
FASTOM-ni gital dilgiparangara, president-na Diningroy Marwein, vice president-na Sanborn Jungai aro Kinstar Momin, general secretary-na Sainbor John Lyngdoh aro gipinrang ong·a. Garo Hills-o Fastom-ko Elvis R Marak, president ong·e dilangskagen ineba u·iataha.