U·IATTIMGIPAONI
KHARKUTTA: Jal Jeevan Mission (JJM)-ni kamna Meghalaya sorkariko ma·mong sorkari mittelpile, ‘boksis’-rangko on·dapengoba North Garo Hills a·jao aro mongsongbate Kharkutta C&RD Block-ni ning·o donggipa bang·a songrangon JJM-ni kamrangko matchotchipkujaenga aro maming namgnirangko man·jaenga ine jolo songdongenggipa manderang matnangataha.
Kharkutta jolo donggipa Rongbu songo songdongenggipa manderangni parakatani gitade, 2021 bilsiona kingkingan songni manderang china maming neng·nikanirangko chagrongna nangkujachim indiba 2021 bilsio JJM-ni kamrangko a·bachengata intalan songni manderang china neng·nikanirangko man·skana nangengahachim.
Rongbu water scheme-ni ning·o Lower Rongbu, Upper Rongbu, Bagabatta aro Bakanda songni manderangna chirangko sale on·na gita Lower Rongbu songo mongsonggipa tengkiko donahachim indiba da·o bilsi gittam ong·pilona kingkingan ia songrango nokdang ge·saba chirangko man·kujaenga ine jolni manderang parakataha.
Ia scheme-ara JJM-ni ning·o ga·akgipa scheme-an ong·a ine songni manderang a·kangtokengon, ia scheme-ara a·doknisa ine department official-rangde aganskaengachim.
Indake ong·engon, ia scheme-ko a·bachengataoni bilsi gittam ong·pilahaoba songni manderang chirangko man·tokkujaengani gimin ia song dambrini manderang, Kharkutta-ni MLA Rupert Momin-na u·iatahachim indiba maming namgnirangko man·jaenga ine songni manderang parakataha.
Songni saksa Neswell Momin minggipa mandeni parakatani gitade, a·bachengo ia scheme-na chibisikko sandianio neng·nikanirangko chagrongna nangahachim maina a·bachengode Mangsang Songmong songni chibisikoniko chi salbana tik ka·aniko songni manderang jegaltokachim indiba ja·mano MLA Rupert Momin-ni dakchakanichi ia jolo donggipa dingtang dingtang songrangni gisepo tom·e chanchirimenba, ia neng·nikanikode namatna man·aha.
Lower Rongbu songo rikgipa tengkiko a·briosa rikahani a·sel ian wachini somoirangode songni manderangna kenchakna nangani ong·enga ineba songni manderang parakataha.
“Skangon chinga an·tangtangni man·enggipa chirangchi chu·ongnikaniko man·engachim indiba JJM-ni ning·o chingna chiko sale on·skana ine uamang chingni chi pipe-rangko ra·galtokahaaro untalan chinga chirangkoba man·srangjaengaha,” ine songni mande saksa suk ong·gijaniko parakataha.
Indake ong·engon, JJM-ni kamrangko matchotjae songni manderang chirangko man·tokjaengani gimin ja·mano songni manderang jinma tom·e chanchirimangenba, a·dokni PHE Minister-na aro a·dokni Chief Minister Conrad K Sangma-naba lekkako sedoataha aro uandaken ja·mano inquiry officer saksako sandirokna gita songona watataha ine u·iataha.
“Inquiry officer, ia bilsini May jao songona re·bae kamrangko niangaha aro uni ja·man contractor-rang aro officer-rangba kamrangko ta·rakatna aro chiko jagnini gisepon sokatna ku·rachakangahachim. Da·o jagni batpilengahaoba obostarang apsankuaienga aro chinga chirangko man·kujaenga,” ine songni manderang parakataha.