U·IATTIMGIPAONI
SHILLONG: Meghalaya a·doko Inner Line Permit (ILP)-ko ra·gatchina dabie, Meghalaya Legislative Assembly-o resolution-ko ra·aoni da·o bilsi bonga gapna jagnimangsan dongaiahaoba, a·doko ILP-ko ra·gatani bidingo ma·mong sorkari maming aganchakanirangko on·skakujaenga.
ILP-ko ra·gatani bidingo maming aganchakanirangko on·kujaengani gimin Khasi Students Union (KSU)-ni dilgiparang iani bidingo rakbate ma·mong sorkari baksa agangrikchina a·dok sorkariko aro a·dokni MP-rangko didiataha.
A·doko ILP-ko ra·gatchina gita dabiangkuengon, Meghalaya Legislative Assembly-on ILP-na resolution-ko ra·manahaode maini gimin ma·mong sorkari iako ra·chakna gita man·skajaenga ine KSU-ni president Lambokstarwell Marngar sing·doataha.
Meghalaya a·dokna ILP-ko nangchongmotenga ine janapatskaengon, Bangladesh a·songoni bang·en manderang Meghalaya a·doko naprukna jotton ka·anirangko nikmanaha aro iandake niam gri napsrukbaaniko champengna gitade ILP-an nambatgipa niam ong·enga ine Marngar parakataha.
Salgro salaramni gipin a·dokrangna on·eba Meghalaya a·dokna ILP-ko on·skajaengani gimin sing·doatengon, a·doko songdongenggipa manderangni nangnikaniko ma·mong sorkari knachakna nangchongmota ine KSU-ni president dabiangaha.
ILP-na dabie KSU, jingjengatanirangko dakna miksonganirang dongama ine sing·anina aganchakaniko on·angengon, iani bidingo maikai ja·kuko de·anggen da·o dipet uamang chanchikuenga ine Marngar parakataha.
