U·IATTIMGIPAONI
SHILLONG: Re·baenggipa 2024 bilsio ong·atna sienggipa Lok Sabha election-na kamrangko United Democratic Party (UDP), ia jani bon·angachibara a·bachengatnaba gnang.
Kobor on·timgiparangni u·iatani gitade, re·baenggipa bilsini Lok Sabha election-na candidate-rangko seokani bidingo aro Shillong Parliamentary seat-o susana gita gisiko nanggipa candidate-rangko dorgasto galna okamani bidingo chanchirimna gita ia jani bon·angachibara UDP tom·aniko ong·atanggen.
Da·o dipet, Shillong Parliamentary seat-oni susana gita UDP-ni tikitna dorgasto galgipa manderangoni Mawlai-ni gitcham MLA PT Sawkmie-ba saksa ong·enga aro koborko man·soani gitade, Hynniewtrep Youth Council (HYC)-ni president Robertjune Kharjahrin baksana Khasi Authors Society-ni president DRL Nonglait-ba UDP-oni susana nangnikenga.
Shillong parliamentary seat-oni susana gita a·dokni Cabinet Minister Paul Lyngdoh, UDP-ni general secretary Jemino Mawthoh aro KHADC-ni gitcham CEM Titosstarwell Chyne-ba UDP-ni tikitna susaengachim ine nikna man·a.
Indake ong·engon, UDP-oni koborko on·ani gitade, UDP-ni dilgiparang, songadam nokadamrango donggipa UDP-ni dilgiparang baksaba tikitrangko on·ani bidingo agangrikna jotton ka·enga.
“Da·o dipetde UDP-ni tikitko on·ani bidingo name tik ka·a dongkuja indiba dingtang dingtang gadangrango agangrikkuenga,” ine UDP-oni kobor on·timgiparang parakataha.
UDP-ni tikitko ja·delbatgipa membor-rangna on·china gita mitam dilgiparangde nangniktokenga ine janapatengon, mitam dilgiparangde, politics-o bak donggipa gital membor-rangna tikit on·aniko nangnikskaenga ine kobor on·timgiparang parakataha.
