NH-6 rama tarianiko sorkari kobor ra·jringenga: Baranwal
U·IATTIMGIPAONI
SHILLONG: Meghalaya a·dokko salgro salaramni gipin a·dokrang baksa nangdimeatgipa National Highway (NH-6) rama namrorojaengahani a·sel pilakan neng·nikanirangko chagrongna nangtokengon, ia ramako tariani bidingo district administration, National Highway Authority of India (NHAI)-oniko kobor ra·jringenga ine Budbar salo East Khasi Hills a·jani Deputy Commissioner Abhilash Baranwal parakataha.
Koborko on·ani gitade, ia ramako tariani re·baenggipa November jani bon·angachibara matchotnaba gnang.
Iani bidingo kobor ra·timgipa baksa agangrikengon, ia rama namroroangjaengahani a·sel re·ruraenggipa manderang pilakan neng·nikanirangko man·na nangengaha indiba ia ramako ta·rake matchotatna gita district administration, NHAI baksa agangrikjringenga ine Baranwal parakataha.
Ia rama tarianiko ta·rakatchina district administration didirongengani gimin rama tarianiko ta·rakbatatna gita NHAI, contractor sakgniko donataha aro NHAI-ni regional director an·tangan rama tarianiko nina gita Kolkata-oni Khliehriat-ona re·baaha ine Deputy Commissioner parakataha.
Baranwal-ni parakatani gitade, iani bidingo ua NHAI-ni chairman baksaba agangrikataha aro ua rama tarianiko ta·rakbatatna gita pilak nanga dakchakanirangko on·na ku·rachakataha.
Batanggimin antignina mikkarang waangahani a·sel kamrangko name ka·na man·jaha indiba da·o mikkarang namangahani gimin kamrangko ta·rakbatatgnok ineba DC parakataha.
Koborko man·soani gitade, rama tarianiko ta·rakatna gita district administration, NHAI-na pilak nanga dakchakanirangkoba on·na ku·rachakataha.
Sonapur-o a·arang be·rongenganichi rama gita re·ruraanirango neng·nikanirangko chagrongna nangrongengani gimin sing·on, ia neng·nikaniko namatna gita NHAI, tunnel-ko bakrodapatna miksongenga ine Baranwal parakataha.