U·IATTIMGIPAONI
TURA: North Garo Hills a·jao higher secondary skul aro college-rang dongjaengani a·sel chubata gadangrango poraina nangenggipa chatro chatrirang neng·nikanirangko chagrongna nangtokenga ine Budbar salo, Rongrong constituency-ni GHADC MDC Rinaldo K Sangma parakatenba, North Garo Hills a·jani headquarter Resubelpara-o sorkari college-ko kulie on·china a·dok sorkariko didiataha
Iani bidingo ua, a·dokni Education Minister Rakkam A Sangma-ko gronge memorandum-koba on·angaha aro Education Minister-na sedoatgipa chittio MDC-ni parakatani gitade, da·o dipet North Garo Hills a·jao higher education-ko on·gipa Mendipathar College ge·samangmangsan dongkuengani a·sel, SSLC aro HSSLC porikkako pass ka·angenggipa hajalni hajal chatro chatrirang, college-o biaprangko man·tokjaengachim.
“Mendipathar College-o da·o dipet Arts Stream-kosan on·engkua aro bilsio bang·gija chatro chatrirangnasan biapko on·na man·engani gimin SSLC aro HSSLC porikkako pass ka·angenggipa hajalni hajal chatro chatrirang mitamde poraiako dontongna nangenga,” ine Sangma suk ong·gijaniko parakataha.
Ia bilsini SSLC porikkao 28.45 aro HSSLC porikkao 65.45 pass percentage-ko man·e North Garo Hills a·jaba a·dok gimiko ja·manchakbatsranggipa a·jarangoni damsa ong·aha ine janapatengon, North Garo Hills a·jao namgipa higher secondary skul aro college-rang donggenchimode, chatro chatrirangna nambata lekka poraniko on·na man·gen ine Rongrong MDC parakataha.
North Garo Hills a·jao bang·bata manderangan chol ong·pagiparang ong·jae dedrangko chel·a biaprangona watate poraiatpana chol ong·ja ine janapatskaengon, a·jatangon namgipa sorkari college donggenchimode, gipin biaprangona re·ange poraina chol ong·pagijagipa chatro chatrirangba poraianiko dontonggija, chubata gadangrango poraidapangpana cholko man·gen ine Sangma parakataha.