U·IATTIMGIPAONI
TURA: East Garo Hills PHE office-ni kamrangni bidingo Right to Information (RTI) Act-ni ning·o sing·sandianina office-ni PIO, chu·onga gita aganchakanirangko on·jaha ine East Garo Hills a·jani saksa Nilberth Ch Marak, East Garo Hills a·jani Deputy Commissioner-na badi ka·doangaha.
Deputy Commissioner-na badi ka·e sedoatgipa chittio Nilberth Ch Marak-ni parakatani gitade, East Garo Hills a·jani PHE office-o ua re·anggipa September jani 10 tarikon RTI-ko ka·ahachim indiba RTI ka·aoni sal 28-ni ja·manba uni chu·ongnika gita aganchakaniko man·kujaengachim.
“PIO-ni RTI-na aganchakanio, ‘Ia office-o maming kobor dongja’ inesan aganchakaiaha aro ua RTI Act-ni Section 6 (3)-o pangchake nangchakegipa official-rangna ba office-naba iani bidingo u·iatskajaha. Niam gitade maiba kamni gimin sing·sandianirangko dakengon, office-o maming kobor dongjagenchimoba salbongani gisepon bilo ong·enggipa official-rangna on·atskae, ia apsan copy-kon dorgasto galgipanaba on·na nangachim,” ine Marak parakataha.
Marak-ni u·iatani gitade, Williamnagar-ni PHE office-o Tender notice ba advertisement-rangko songbadrango gatani, Williamnagar Town water supply project-na chu·gimik tangka chamani, ia project-ni ning·o rikenggipa dam ge·antini gimin, ia project-ni statement-ni gimin, project-ni status ba gadangni gimin, ia project-na tangka paisarangko gamani gimin aro ia project-ni work order-ni gimin ua RTI ka·ahachim.
