U·IATTIMGIPAONI
SHILLONG: Khasi Authors Society (KAS) jekai Khasi ku·sikko Constitution-ni Eighth Schedule-o napatna gita kingkot kam ka·enga, apsan daken A·chikkukoba Eighth Schedule-o napatna gita ku·rang on·tokchina Gambegre constituency-ni Congress MLA Saleng A Sangma, Garo Hills-ni dingtang dingtang dolrangko didiataha.
Khasi ku·sikko Eighth Schedule-o napatna gita KAS rakbee kamrangko ka·dilengani gimin A·chik dilgiparangkoba apsan daken A·chikkuko Eighth Schedule-o napatna gita krengdilchina Sangma didiataha.
Khasi Authors Society baksana adita sak Khasi MLA-rangba New Delhi-ona re·ange Khasi ku·sikko Eighth Schedule-o napatchina dabiengmiting somoio A·chik Minister-rangonide saksaba New Delhi-ona re·ange A·chikkuko Eighth Schedule-o napatna nangengani gimin ku·rangko on·pajaha ine an·tangni suk ong·gijaniko parakatengon, iani bidingo Meghalaya Legislative Assembly-on resolution-ko ra·manahani gimin ia dabianiko chu·sokate on·anio maming neng·nikani dongjawakon ine Sangma parakataha.
“Khasi Authors Society-ni New Delhi-ona re·ange Khasi ku·sikko Eighth Schedule-o napatchina dabianio anga adita sak Khasi MLA-rangkosan nikaiaha indiba Garo Hills-ni minister-rangkode saksakoba New Delhi-ona re·ange ku·tangko Eighth Schedule-o napatchina ku·rang on·aniko nikjaha,” ine Congress MLA janapatenba, A·chik minister-rang ia ja·kuko de·dilgenchimode ua an·tangba iano bak ra·pana kusi ong·aigenchim ine parakataha.
A·chikkukoba Eighth Schedule-o napatchina gita rake ku·rang on·china Khasi-rangko mol·molatengon, Khasi aro A·chikrangara jong-adarang gitan ong·a ine Khasi ku·sikkosan ong·aigija A·chikkukoba Eighth Schedule-o napatna gita dabichina Sangma, Khasi Hills-ni manderangko didiataha.
Iani bidingo Garo Hills-ni manderang, a·dokni CM-ko ma·mong sorkari baksa agangrikchina nangniktokengachim ine janapatengon, ia dabiani bidingo Chief Minister gisik nange mesokna nangchongmota ine Sangma parakataha.
“Ua maming ja·kurangko de·jaenga ong·ode anga iani bidingo una sedoatgen,” ine ua aganaha.
Khasi aro Garo ku·sikrangko Eighth Schedule-o napatchina dabie 2018 bilsion Meghalaya Assembly resolution-ko ra·manahachim indiba da·alona kingkingan iani bidingo ma·mong sorkari aganchakaniko on·kujaengachim ine nikna man·a.