U·IATTIMGIPAONI
TURA: Ru·uta bilsirangonin Assam a·doko songdongenggipa A·chikrangna dingtang Garo Autonomous Council (GAC)-ko on·china dabitokengoba da·alonan ia dabianiko Assam sorkari chu·sokate on·kujaengani gimin mikkangchi Assam a·doko songdongenggipa A·chikrang, GAC-na bilakbate dabiangna gita tik ka·e donangaha.
Bristibar salo, Garo Autonomous Council Demand Committee (GACDC)-ni tom·bimonganiko Assam a·dokni Bakrapur songo ong·atanio Assam a·doko songdongenggipa manderang, mikkangchi bilakbate GAC-na dabina gita tik ka·angaha.
Ia tom·bimonganiko ong·atanio Assam a·dokni dingtang dingtang A·chik songrango songdongenggipa manderang aro gipin biaprangoniba sak 10,000-na baten bakko ra·angtokaha aro Assam a·doko songdongenggipa A·chikrangna dingtang GAC-ko nangengani gimin pilakan ku·rang on·angtokaha.
Assam a·dokni Goalpara aro Kamrup a·jarango songdongenggipa A·chikrang, Rabha Hasong Autonomous Council (RHAC)-ni ning·osa dongna nangengkuani a·sel mamingni gitan tang·dopana man·jaengani gimin 2003 bilsio Scheduled Tribe (ST) gadangko man·chengaonin Assam a·doko songdongenggipa A·chikrangnaba, dingtang Garo Autonomous Council (GAC)-ko songe on·china gita Assam sorkari aro ma·mong sorkario dabiengachim ine nikna man·a.