U·IATTIMGIPAONI
TURA: Meghalaya Board of School Education (MBOSE)-ni Golden Jubilee ba bilsi 50 gapaniko Tura-o salgittamna maniangengon, ia manianiko Mongolbar salo dingtangmancha bike rally-ko ong·atanichi a·bachengataha.
Bike rally-ko pring 9:15 baji dipet MBOSE campus-oni a·bachengatenba Walbakgre-o donggipa Green Haven-o matchotataha aro ia bike rally-o NH-51, MBOSE-ni staff aro dingtang dingtang skulrangba bak ra·angtokaha.
Ia bike rally-ko Tura Municipal Board-ni Chairman JD Sangma a·bachengate on·angaha aro ia bike rally-ko a·bachengatanio dingtang dingtang official-rangba dongpae bak ra·angtokaha.
Gnigipa salo, chong·motan da·al October-ni 18 tariko a·dokni Deputy Chief Minister Sniawbhalang Dhar, mongsonggipa sokgipa ong·e bakko ra·anggen aro unbaksana a·dokni Education Minister Rakkam A Sangma, Education department-ni Commissioner & Secretary Pravin Bakshi aro dingtang dingtang official-rangba dongpae ia manianio bakko ra·anggen. Da·al salpaksachibara dingtangmancha ‘The Spread of Education in Meghalaya’-ni bidingo Academic Discourse Session-ko ong·atanggen aro ia Session-o dingtang dingtang manderang, on·gimin katta bichong pangchake jinmana aganprakanggen.
Ia maniani bon·kamgipa sal, chong·motan October-ni 19 tariko, a·dokni Chief Minister Conrad K Sangma, mongsonggipa sokgipa ong·e bakko ra·angskagen aro unbaksana a·dokni Education Minister Rakkam A Sangma, Meghalaya sorkarini Chief Secretary DP Wahlang aro gipin official-rangba dongpae bak ra·anggen. Ia apsan salni pringo dingtangmancha ‘Road Map of State Education Board under NEP 2020’-ni bidingo Academic Discourse Session-ko ong·atanggen aro iano salgro salaram jolo donggipa dingtang dingtang board-ni official-rang bakko ra·anggen.