U·IATTIMGIPAONI
SHILLONG: Meghalaya a·dokni deficit skulrango skigiparang, kamoni neng·takangenggipa skigiparangna pension-ko on·china sorkario dabiangtaiaha.
Retired Deficit School Teachers Association-ni president ED Nongsiang-ni parakatani gitade, deficit skulrango skie kamoni neng·takangenggipa skigiparangna ru·uta bilsirangonin pension-ko on·china dabiengachim indiba da·onan uamangni dabianiko chu·sokate on·kujaengani gimin Budbar salo uamang, a·dokni Chief Minister Conrad K Sangma-ko gronge iani bidingo agangrikangaha.
“Kamoni neng·takanggipa deficit skigiparangna pension-ko on·china chinga ru·uta bilsirangonin dabiengahaoba da·alona kingkingan sorkari mamingkoba dakkujaenga. Uni gimin chinga chief minister-ko gronge memorandum-ko on·taiaha,” ine Nongsiang aganaha.
Meghalaya a·dok gimiko kamoni neng·takgimin sak 2000-mangni gita deficit skigiparang donga ine talataniko on·angengon, uamangni dabianiko chief minister niatna ku·rachakaniko on·ataha ine Nongsiang parakataha.
