U·IATTIMGIPAONI
AMPATI: South West Garo Hills a·jao Durga Pujako maming a·sel gri tom·tomao ong·atna man·na gita October 21 tarikoni a·bachenge, dingtang dingtang rama gita dal·dalgipa garirangni re·ruraaniko District Magistrate champengatchengaha.
District Magistrate-ni ge·etaniko on·atani gitade, South West Garo Hills a·jao Damalgre-oni Garobadha-ona, Gonglanggre-oni Garobadha-ona aro Monabari-oni Garobadha-ona dakanggipa ramarang, jean Garobadha bazaar-o naeachim, ia ramarang gita dal·dalgipa garirang, jekai truck, lorry, dumper aro uandakgipa garirangni re·ruraaniko October-ni 24 tarik pring 11:00 bajioni attam 7:00 bajiona champengataha.
Durga Puja manienggipa manderang, tom·tome re·rurana aro an·tangtangni mandap-rangko manina man·na gita dal·dalgipa garirangni re·ruraaniko champengatchengaha ine SWGH a·jani District Magistrate u·iataha.
Ia somoirango dongimin niamrangko ja·rikchina aro sorkari baksa bakrimchina gitaba District Magistrate, pilakkon mol·molataha.
