U·IATTIMGIPAONI
TURA: Adita salrangna skang, North Eastern Hill University (NEHU) Tura campus-ni hostel damsao Nagaland a·dokni chatro saksako ‘ragging’ ka·gipani bidingo am·sandianirangko dake adita sakkirangko man·na a·bachengaha ine Sukrobar salo, West Garo Hills a·jani Superintendent of Police (SP) Abraham T Sangma parakataha.
Indake ong·genchimoba da·o Durga Pujana NEHU-ko chutti watahani gimin iani bidingo sandirokaniko police-rang dontongatchengna nangao ga·akaha ine Sangma parakataha.
“Ia a·selni bidingo chinga adita sakkirangkode man·na a·bachengaha indiba chatro chatrirang chuttina re·angahani gimin uamangni re·bapilaniko sengna nanggnok. Sakkirangko chu·onga gita man·ahaon chinga ia a·selni bidingo kakketko ma·sina man·gnok,” ine SP parakataha.
Koborko on·ani gitade, ia a·sel ong·ani re·anggipa October 8 tarik walo, Chasingre-o donggipa NEHU Tura Campus-ni Arbella Boys’ Hostel-o ong·aha aro ua somoio chatro saksako, adita sak manderang, uni kuturioniko okamatenba, kuturi ge·saona rimange, uni ba·ra cholarangko okmilongate jinmani mikkango chrokate roahachim. Ia manderang, ia chatroni kosako ka·mikkenatanirangkoba dakahachim.
Ia a·selni bidingo chatro chatrirang, NEHU-ni proctor Dr Gino A Sangma-na badi ka·e sedoatenba, campus-ni gita ning·in ning·in sandirokatani ja·mansa iani bidingo ma·sina man·ahachim.
Ia a·selni bidingo adita salrangna skangsan, Shillong-ni Naga Students Union (NSU)-ba, dingtang dingtang dolrang aro NEHU-ni official-rang baksa chanchirimenba, dos dakgipa manderangko ta·raken rim·china dabiangaha.
Ia a·selni bidingo dongnuna jotton ka·aha aro dos dakgipa manderangni kosako maming ja·kurangko de·jaenga ineba NSU, NEHU-ni Vice Chancellor PS Shukla-ko matnangataha.
