U·IATTIMGIPAONI
AMPATI: South West Garo Hills a·jani Rerapara C&RD Block-ni ning·o donggipa Upper Damalgre songo Lay by Market-ko Bristibar salo, Rangsakona-ni MLA Subir M Marak-ni jakchi kulie on·angaha.
Ia Lay by Market-ko kulina gita dingtangmancha program-ko Agriculture aro Horticulture department-rang ong·ataha aro ia gital kuligipa Lay by Market-o ge 24 stall-rang, community hall damgni aro me·a me·chikna dingtang dingtang toilet-rang donga.
Ia project-ko rikna gita Horticulture department, SPA 2013-2014-ni ning·o gong lak 72.51 tangkarangko koros ka·aha aro iako DRDA jako ra·e rikaha.
Ia Lay by Market-ko kulie on·angani somoio Rangsakona MLA, jinmana aganprakangengon, ia Lay by market-ko kulianichi songo nok game ge·e aro bading chiwale cha·enggipa manderang, an·tangtangni game ge·e man·gipa bosturangko an·tangtangan palna sim·na man·gnok aro gipinrango pangchakna gita nangjawaha ine parakangaha.
Ia Lay by Market-ko an·tangtangni namgnina jakkalengon, ia market-ko name rongtale jakkalchina gitaba Marak, game ge·e cha·enggipa manderangko didiangaha.
Ia Lay by Market-ko kulianichi game ge·e cha·enggipa manderangnasan ong·aigija songni nokni pilak manderangna namgni ong·gen ineba ua an·tangni ka·dongchakenganiko parakangaha.
Upper Damalgre-o cha·rongenggipa antiko ia gital Lay by Market-ona apjitbaskachina gitaba Rangsakona MLA, jolni manderangko didiangaha.
Ia Lay by Market-ko kulianio dongpae bak ra·anggipa gipin manderangara, Ampati-ni ADC YW Momin, Rerapara Block-ni BDO Armand Ch Momin, Damalgre-ni Nokma, dingtang dingtang department-ni officer-rang aro songni manderang ong·a.
