U·IATTIMGIPAONI
TURA: South Garo Hills a·jani Rongara sorkari hospital-o sagiparangko sanna gita doctor-rang dongjani a·selo songni nokni manderang neng·nikanirangko chagrongna nangtokenga ine kobor on·aha.
Jolo songdongenggipa manderangni parakatani gitade, re·anggipa October 22 tarik walo, mande saksa a·sel ong·anichi ja·arang saknaaniko man·ahani gimin songni manderang, ia mandeko sanna gita hospital-ona rimangahachim indiba ua somoio hospital-o doctor dongjachim aro nurse saksasa ia mandena Tetanus Toxoid (TT) bijiko su·e, saknaaniko namatmangmang samkosan on·e watpilataiahachim.
“Rongara hospital-o sagiparangko sanna gita doctor-rang dongjani a·sel ua somoio saknaa man·gipa mande aro uni nokdang, namen neng·nikanirangko chagrongna nangaha. Hospital-o doctor dongjani gimin maming cholrang dongjae chinga walni 10:00 bajimango uko uni nokona rimangpilna nangaiaha,” ine saksa T Sangma minggipa mande parakataha.
Hospital-o doctor dongjani a·sel songni nokni manderang iandakgipa neng·nikanirangko chagrongna nangtokengani gimin ta·raken ia hospital-ona doctor-rangko watatchina gitaba ua sorkariko didiataha.