U·IATTIMGIPAONI
SHILLONG: National Education Policy (NEP) 2020-ko 2023-2024 Academic Session-onin undergraduate course-rangna a·bachengna gita Bristibar salo, North Eastern Hill University (NEHU)-ni Academic Council (AC) tik ka·angaha.
Bristibar salo, NEHU-ni Academic Council, tanggitik tom·e chanchirimangenba, NEP 2020-ko 2023-2024 academic session-oni a·bachengna tik ka·angaha.
NEP-ni syllabus gita question paper-rangko tarikujaengani gimin first semester-ni chatro chatrirangna session-ko ra·dodapatna gitaba ia tom·anio AC-ni membor-rang tik ka·angaha.
Tom·a matchotani ja·man Academic Council-ni JAC chairman Prof Lakhon Kma, kobor ra·timgipa manderang baksa agangrikengon, undergraduate course-rangna NEP-ko ra·gatani bidingo NEHU-ni Vice Chancellor, Academic Council-ni ra·chakchengani grisa parakatahani gimin da·alo Academic Council-ni tik ka·anina uamang kusi ong·aha ine parakataha.
University-ni iandake nangchongmotgipa kamrangko Academic Council-sa tik ka·rongani gimin NEP-ko ra·gatani bidingo VC-ni July 12 tariko u·iataniara niamni kosako re·anisa ong·achim ineba Prof Kma aganaha.
JAC chairman-ni parakatani gitade, Academic Council-ni chang 110-gipa tom·aniko ong·atani somoion uamang NEP-ko ra·gatna gita tarikuja ine tik ka·manahachim indiba NEHU-ni VC an·tangsa Executive Council-o adita niamrangko tarie NEP-ko ra·gatdrana jotton ka·ahachim.
Academic Council-ni tom·aniko ong·atenba, uni dakgualaniko namdapatchina Meghalaya College Teachers Association (MCTA)-ba VC-ko didiahachim ine janapatengon, VC-ni iandake knachakna gisiko nangjahani a·sel minute 15 ba minute 20-o matchotatna man·gipa kamko da·o jagittammang ong·pile somoi ra·na nangaha ine Academic Council JAC-ni chairman parakataha.
Chatro chatrirangni aro college-rangni namgnini gimin chanchie uamang NEP-ko a·bachengatna tik ka·aha ineba Prof Kma parakataha.
First semester-ni chatro chatrirangna session-ko ra·dodapatani gimin janapatengon, first semester-ni porikkako pangna ra·ronga gitan November jao ra·angaigen indiba NEP-ni syllabus gita question paper-rangko tarikujani gimin session-ko ra·dodapatna nangenga ine Prof Kma aganaha.
“Question-rangko tarina gita NEP-ni ning·o Model Paper-ko tarichengna nanggen aro ia Model Paper-ko October-ni 31 tariko Academic Council-ni tom·anio ra·gatnaba gnang,” ine ua aganaha.
Syllabus-ko chu·gimik dingtangatna nangengani gimin skanggipa batch-ni chatro chatrirangde pangnan iandakgipa neng·nikanirangko chagrongna nangrongaia ineba JAC chairman aganaha.