U·IATTIMGIPAONI
TURA: A·songni ming 38 ku·sikrangko Constitution-ni Eighth Schedule-o napatna list ka·gipa ba biming segatgipa ku·sikrangko Home Affairs Ministry-ni parakatanio A·chikkukode watchanggalahani gimin Garo Hills-ni dingtang dingtang dolrang aro dilgiparang suk ong·gijaniko parakatani ja·man, da·o A·chikkukoba Eighth Schedule-o napatna list ka·gipa ku·sikrango donga ine seachi u·iatna gita Sukrobar salo, ma·mong sorkarini official-rang ku·rachakaniko on·ataha.
Sukrobar salo, Tura-ni MP Agatha K Sangma, Meghalaya Assembly-ni Speaker Thomas A Sangma aro a·dokni PHE Minister Marcuise N Marak-ni dilanichi A·chik Literature Society (ALS)-ni dilgiparang, New Delhi-ona re·ange, ma·mong sorkarini official-rangko grongeanio ia ku·rachakaniko ma·mong sorkari official-rang on·ataha.
Sukrobar salo A·chik Literature Society-ni dilgiparang, Home Affairs Ministry (India)-ni Secretary AK Bhalla aro Home Affairs Ministry (Language)-ni Joint Secretary A Subramanian-ko New Delhi-o grongenba, a·song gimikni ming 38 ku·sikrangko Eighth Schedule-o napatna list ka·anio A·chikkukoba chapatchina didie memorandum-ko on·angahachim.
MHA-ni official-rangko grongeani ja·man jinmana parakatengon, “A·chikkukoba Constitution-ni Eighth Schedule-o napatchina dabienggipani bidingo chingni agangrikani chu·sokgipa ong·aha. Garo ku·sikkoba skangonin Eighth Schedule-o napatchina dabianirang dongachim aro da·alo chingni mol·molaniko knachake, Garo ku·sikkoba Eighth Schedule-o napatna list ka·e donenggipao chapatna gita MHA official-rang chingna ku·rachakaniko on·ataha,” ine Tura-ni MP Agatha K Sangma parakataha.
Meghalaya a·dokni Khasi aro Garo ku·sikrangko Indian Constitution-ni Eighth Schedule-o napatchina gita ma·mong sorkariko didie, 2018 bilsini September jaon, Meghalaya Legislative Assembly resolution-ko pass ka·manahachim ine nikna man·a.
A·songni ming 38 ku·sikrangko Constitution-ni Eighth Schedule-o napatna list ka·anio Meghalaya a·dokni Khasi ku·sikkoba man·chapate A·chikkukode watchanggalskaahachim ine nikna man·a.
Iani ja·man Garo Hills-ni dingtang dingtang dolrang, a·songni Prime Minister Narendra Modi, Union Home Minister Amit Shah aro dingtang dingtang dilgiparangna sedoatenba, A·chikkukoba Eighth Schedule-o napatchina gita mol·molattokahachim.