U·IATTIMGIPAONI
TURA: Ia chang 100 Drums Wangala manianiko November 9 tarikoni 11 tarikona Jengjal-ni Baljek Airport-o ong·atskaengon, ia Wangala manianio bak ra·enggipa aro nina re·baenggipa manderangko sokachakna gita kamrang da·o matchotangengaha.
Ganol chibimao hydel project-ni dam-ko rikahani a·sel Wangala A·dam Chibragre-ona tarianggipa dolongko da·o chi mripahani gimin ia chang 47-gipa 100 Drums Wangala Festival ba Dama Bol 100-ko doke Wangala manianiko Jengjal-o donggipa Baljek Airport-o ong·atskaengachim.
Ia chang 100 Drums Wangala manianiko Baljek Airport-o ong·atengani gimin Wangala committee-ni president Rikman Sangma, kobor ra·timgiparangna talate on·angengon, Wangala A·dam Chibragre-ona tarianggipa dolongko da·o metre-gni ong·e chi mripahani gimin Wangala manianiko ong·atani somoio manderangna re·a doanio neng·nikani ong·gen ine nikenba, ia chang 100 Drums Wangala manianiko Jengjal-ni Baljek Airport-o ong·atskana tik ka·aha ine parakataha.
“Wangala A·dam Chibragre-ona gital dolongko taria matchotkujaskal Wangala manianiko Baljek Airport-o ong·atskachina chingko district administration aganahani gimin chinga ia chang 100 Drums Wangala manianiko ia biapo ong·atskana nangaha. Indiba ia biapo chi aro bijolirang dongjae Wangala manianiko sokachakna tarisoanio bang·en neng·nikanirangko man·na nangaha. Bijoli dongjani gimin chinga generator-rangko jakkalskana nangenga aro chikode PHE department, km 2-mang chel·ao donggipa chiringoniko salbae dakchakenga,” ine Sangma aganaha.
Indake ong·genchimoba, ia biapara West, East aro North Garo Hills a·jani bijangchi gita ong·ani gimin Wangala manianiko sokachakna namgipa biap ong·a aro ianona chinga manderangko bang·bate sokbana ka·dongenga ine 100 Drums Wangala Festival Committee-ni president parakatskaaha.
“Ia Wangala manianio chinga jolni manderangna, self help group-rangna aro gipinrangnaba dokkanrangko dakna gita dam 160 stall-rangko donaha. Una agreba ia manianio chinga jatni mingdok kal·susaanirangkoba ong·atna tarisomanaha. Ia chang Wangala manianio gimik sak 300 chrokgiparang bakko ra·anggen aro uamang Budbar salon sokbae an·tangtangko tarisamsotokgnok,” ine Sangma aganaha.
Ia salgittamna ong·atenggipa 100 Drums Wangala maniani skanggipa salo, GHADC-ni CEM Albinush Marak aro bon·kamgipa salo a·dokni Deputy Chief Minister Prestone Tynsong, mongsonggipa sokgipa ong·e bakko ra·anggen.