U·IATTIMGIPAONI
SHILLONG: Meghalaya a·doko mikkarang warongani gimin bilsiprakon billion cubic litre 63 chirangkode man·rongachim indiba chirangko rakkie donjani a·selo billion cubic litre 1-kosan rakkirikna man·enga ine Budbar salo, a·dokni Chief Minister Conrad K Sangma, Jal Jeevan Mission (JJM)-ni ning·o Meghalaya Water Smart Kid campaign-ko a·bachengate on·angani somoio parakataha.
Ia Meghalaya Water Smart Kid campaign-ara, JJM-ni ning·o bi·sarangna chirangko chimonge jakkalani bidingo ma·siate on·na a·bachengatenggipa program ong·achim.
Ia program-ko a·bachengatanio, Ri Bhoi a·jani Lumshyiap Village & Water Sanitation Community, West Garo Hills a·jani Darechikgre Village & Water Sanitation Community aro West Garo Hills a·jani Dura Kantagre Village & Water Sanitation Community-na ‘Water Guardians’ program-ni ning·o a·dokni Chief Minister Conrad Sangma aro PHE Minister Marcuise Marak-ni jakchi award-rangkoba on·angjolaha.
Ia tom·anio a·dokni Chief Minister, jinmana aganprakangkuengon, mikkarang waanichi bilsiantian billion cubic litre 63 chikode man·engani gimin a·gilsak gimiko Meghalaya a·dokba sosibatsranggipa biaprangoni damsa ong·achim indiba ia billion cubic litre 63-oni billion cubic litre 31-de Bangladesh a·songona aro billion cubic litre 31-de Assam-onasa jokangskaenga ine parakangaha.
Chirangko rakkie donna gita a·dok sorkari dingtang dingtang ja·kurangko de·enga aro ia kamrango externally aided project (EAP)-rang aro India sorkarini Jal Shakti Ministry-ba dakchake on·enga ineba Chief Minister aganaha.
Chief Minister-ni aganani gitade, JJM aro EAP-rangni dakchakanichi a·dokni PHE department, gong crore 8000-mangni gita tangka paisarangkoba man·aha.
JJM-ni ning·o Meghalaya a·dokna nambatgipa kamni boksisko Jal Shakti Ministry-ni gita on·aha ine janapatengon, da·o dipet Meghalaya a·doko lak 4-na baten nokdangrangna chi pipe-rangko sale on·na man·aha aro re·baenggipa bilsini March jani gisepode nisan donsoenggipa gimik lak 6 nokdangrangnan chi pipe-rangko sale on·na man·gnok ine Chief Minister parakataha.