U·IATTIMGIPAONI
SHILLONG: North Eastern Hill University (NEHU)-o NEHUTA, NEHUSU aro NEHUNSA dolrangni nangrime bikotgipa Joint Action Committee (JAC)-ni dabianirangko knachakna gisiko nangjaengani gimin NEHU-ni Vice Chancellor (VC) Prabha Shankar Shukla-ko jegale, November 13 tarikoni ‘indefinite strike’-ko ong·atna tik ka·angaha.
JAC-ni chairman Lakhon Kma-ni parakatani gitade, niam gri technical officer/senior consultant-ni kamna seokako man·gipa Rohit Prasad-ko ta·raken kamoniko ra·galpilchina, statutory officer aro university engineer-rangko ta·raken songchina, University Health Centre-ko namdapatchina aro NEHU-ni skigiparang aro technical staff membor-rangko ministerial duty-rangoniko watchina dabie JAC, November 13 tarikoni dontonggija jingjengatanirangko dakna sienga.
JAC-ni gipin dabianirangko janapatengon, NEHU-o bus service-ko on·dapchina, chi aro bijoliko nambate on·china, health centre, pension cell, block level-oni songadam nokadamrangona quota-ko nipilchina aro uandakgipa dingtang dingtang dabianirangan ong·a ine Kma parakataha.
“Uni gimin November-ni 13 tarikode pilak membor-rangkon university-ona sokbana ka·dongenga,” ine JAC-ni chairman parakataha.
Rohit Prasad-ko NEHU-ni senior technical officer songanio NEHU-ni dongimin niamrangko aro UGC Model CRR (Cadre Recruitment Rules)-ko pe·ahani gimin NEHU-ni VC Prof PS Shukla-ni kosako High Court-o ijahar ka·ani cholrang donga ine salsa skangsan JAC-ni chairman Prof Lakhon Kma parakatahachim.
“NEHU VC-ni kosako ja·kurangko de·na gita chinga dingtang dingtang cholrangko nichenggen. Nanggenchimode chinga uni kosako High Court-oba ijahar ka·na nangaigen,” ine Kma aganaha.
Prof Kma-ni parakatani gitade, niam gri kamo rakkiako man·gipa Rohit Prasad-na batanggimin ja 10-na kingking dormaharangko on·ahani gimin una on·gipa dormaharangko man·pilna gita Prof Shukla-ni dormahaoniko kattiskana nanggen ine JAC niamko donmanaha.
“Ia niamko maikai chinga donatna man·gen ukosa chanchienga indiba iako High Court-ona ra·angenba chinga niam ong·atna ka·dongenga,” ine JAC-ni chairman aganaha.
Rohit Prasad-ko ua niamo pangchakesa NEHU-ni senior technical advisor songaha ine VC-ni a·kanganiara manderangko cha·bokna jotton ka·anisa ong·enga ine janapatengon, ua UGC Model CRR-ni niamko pe·ahani gimin uni kosako JAC, a·songni President aro University-ni Visitor Droupadi Murmu baksana Meghalaya a·dokni Governor aro University-ni Chief Rector Phagu Chauhan-naba sedoatna tik ka·aha ine Prof Kma parakataha.
