BSF sipairang chini bag 270-ko sima jolo rim·a

U·IATTIMGIPAONI TURA: Re·anggipa Sonibar salo, West Garo Hills a·jao donako man·enggipa 100 Battalion BSF-ni sipairang, Meghalaya Police baksa nangrime Garo Hills aro Bangladesh a·songni sima jolo, badingsrukatna miksongenggipa bag 270 chinirangko rim·na man·aha. Ia chinini jreaniara kg 13,500 ong·achim aro iani damara gong 5,40,000 ong·achim. Sima ari gita ma·manti bosturangko Bangladesh a·songona badingsrukatna jotton ka·enga ine koborrangko man·soani ja·man 100 Bn BSF aro Meghalaya Police-ni sipairang, sima jolo donggipa Paulpara songrangoniko am·sandienba ia bang 270 chinirangko rim·na man·aha. BSF official-rangni u·iatani gitade, ia chinirangko Paulpara songni galchipgimin nok te·sao dongnue donengachim indiba BSF aro Police-rang bakrime sandienba, ia chinirangko rim·na man·aha.