U·IATTIMGIPAONI
AMPATI: Mongolbar salo, South West Garo Hills a·jaoba Children’s Day ba Bi·sarangni Salko Ampati-ni Multi Facility Centre-o maniangaha aro ia salko manianio bi·sarangna dingtang dingtang kal·susaani, git ring·susaani, golpo agansusaani aro uandakgipa dingtang dingtang program-rangko ong·atangaha.
Ia Children’s Day-ko South West Garo Hills District Administration, ICDS aro MSRLS baksa nangrime manidilangaha aro ia salko manianio, South West Garo Hills a·jani Additional Deputy Commissioner RZD Shira, mongsonggipa sokgipa ong·e bakko ra·angaha.
Ia salko manianio Shira, jinmana aganprakangengon, bi·sa sakantikon ka·sana aro mande ra·na nangani gimin aganangenba, bi·sarangko dal·atanio be·en bimangni gitasan ong·aigija gisikni gitaba an·senggiparang ong·atchina didiangaha.
Bi·sarangko namao dal·atani gimin aganangengon, bi·sarango namgipa gunrangko ong·atchina gita Shira didianiko on·angaha.
Ia salko manianio dongpae bakko ra·anggipa gipin manderangara, SWGH a·jani District Social Welfare Officer ZR Marak, Zikzak-ni CDPO TK Marak, DSEO T Marak, Anganwadi worker-rang aro gipinrang ong·a.