U·IATTIMGIPAONI
TURA: West Garo Hills a·jani a·kawe jolrango, mongsongbate Gomaijhora jolrango niam gri ro·ong quarry-rangko kulie chalaitaiengaha ine koborrangko seatani ja·man, Garo Hills Autonomous District Council (GHADC)-ni forest official-rang, ia biaprango niam gri chalaienggipa ro·ong quarry-rangko chipatna gita ja·kurangko de·chakataha.
Ia jolrango GHADC-ni check gate aro Forest Development Corporation of Meghalaya (FDCM)-ni office donggenchimoba, ia jolrango komibeoba dam 12 ro·ong quarry-rang aro dam 4 ro·ong jetani karkanarangko kulie chalaitokenga ine songni manderang u·iatahachim.
Iani bidingo GHADC-ni Chief Forest Officer Rangku N Sangma-na u·iatani ja·man, Mongolbar pringon ua GHADC Phulbari Forest Range-ni official-rangko, am·sandina gita watataha indiba Forest official-rangni ua biapona re·angenganiko kobor man·soenba, ua jolrango niam gri ro·ong quarry-rangko chalaienggipa bang·bata manderangan, an·tangtangni quarry-rango jakkalgipa bosturangko ra·e katsotokaha ine u·iataha.
Forest official-rangni u·iatani gitade, ia biaprangona Forest official-rang sokango, bang·bata quarry-rangon bangbang ong·anikosa nikeaha indiba quarry damsao kam ka·enggipa manderangko Forest-ni manderang rikangon, uamangoni saksa chi sate galna jakkalgipa ostro ge·sako ua biapo gale kataha.
Niam gri chalaienggipa ro·ong quarry-rangoniko Forest official-rang, ro·ong bikotna jakkalgipa gipin bosturangkoba man·aha ine kobor on·aha.
Ia bosturangko Forest official-rang rim·enba ja·mano, Phulbari Forest office-ona ra·baaha.
