U·IATTIMGIPAONI
TURA: South Garo Hills a·jao Chokpot-oni Sibbari-ona nosto ong·gimin ramako taridapani kamrang namjaenga ine Garo Students Union (GSU) Chokpot regional unit matnangataha.
GSU Chokpot regional unit-ni general secretary Spensar R Sangma-ni u·iatani gitade, Mongolbar salo uamang, Chokpot-oni Sibbari-ona taridapenggipa ramako nieon, ia ramako tarienggipa CCL company, ro·ong tang·galanggipa bakrangkon alamla a·arangchi dape, pitch on·engakosa uamang nikbana man·ahachim.
“Chokpot-oni Baghmara-ona kam nangana re·ruraenggipa manderangni badi ka·anirangko man·soe chinga ia ramako nina re·angon, nosto ong·gipa ramani bakrangko alamla dapesan pitch on·dapenga ine chinga nikbana man·aha. Uni gimin chinga kamko nirokenggipa mohoriko grongenba, ia ramako name tarichina ku·pattie donbaaha,” ine GSU Chokpot regional unit-ni general secretary parakataha.
Chokpot area-na ma·mong aro a·dok sorkarirangni ka·sae chamatenggipa scheme-rangko name kam ka·na nanga ineba GSU Chokpot unit mikrakataha.