U·IATTIMGIPAONI
SHILLONG: Hynniewtrep National Liberation Council (HNLC) bobil dolni chubata gadango donggipa dilgiparangko da·o gnigipa aro gittamgipa changni agangrikaniona re·bachina gita a·dok sorkari okamataha.
A·dokni Deputy Chief Minister aro Home Minister Prestone Tynsong-ni kobor ra·timgiparangni parakatani gitade, HNLC bobil dol baksa sorkari, changsasan agangrikna man·engkua aro ua chang agangrikgiparangba HNLC bobil dolni chubata gadango donggipa dilgiparangde ong·jachim.
Sorkari baksa agangrikanio HNLC bobil dolni maiba neng·nikanirang donggenchimode apsan agangrike namatna man·na gitasa sorkari baksa agangrikanio HNLC bobil dolni chubata gadango dilgiparangko bakko ra·echina gita sorkari mol·molatahachim ineba Tynsong aganaha.
HNLC bobil dolni kosako donggipa case-rangko kema ka·china dabienggipani bidingo sing·anina Home Minister, ia kattarangko aganaha.
Iani bidingo HNLC-ni aganchakanina sorkari senge dongenga ineba ua aganaha.
HNLC bobil dol, ma·mong aro a·dok sorkarini agangrikani gadangni bidingo janapatskaengon, “Chinga ma·mong aro a·dok sorkarionide ia agangrikaniko matchotatna nangnikenga aro iani giminsa uamangni aganchakanina senge dongenga. Batanggimin chang agangrikanio uamangni dal·batgipa dilgiparangan dongpana man·jahani gimin chinga HNLC-ni membor-rangko watatpile, uamangni dilgiparang agangrikna tariahao chingna u·iatchina mol·molataha,” ine Deputy Chief Minister aganaha.
Tynsong-ni parakatani gitade, da·o changgipin agangrikaninaba ma·mong aro a·dok sorkarirang, HNLC bobil dolni dilgiparangko senge dongengachim.
Ia bilsini June jao skanggipa changna sorkari baksa agangrikanio, HNLC-ni dilgiparang, an·tangtangni kosako donggipa case-rangko kema watchina bi·ahachim aro sorkariba uamangni case-rangko kema ka·na ku·rachakahachim.
HNLC bobil dolna ku·baltitimgipani kamko ka·enggipa Sadon Blah-ni parakatani gitade, dingtang dingtang a·jarango police-rang, HNLC bobil dolni dilgiparangni kosako baditaba ming case-rangko ka·ahachim.
HNLC bobil dol baksa agangrikangkuna skang, uamangni case-rangko kema ka·na man·ama man·jawa ukosa da·o dipet chanchikuenga ineba ua aganahachim.
