U·IATTIMGIPAONI
SHILLONG: Meghalaya a·doko Inner Line Permit (ILP)-ko ra·gatna man·jaenga ong·ode Meghalaya Residents Safety & Security Amendment Bill (MRSSAB)-ko ma·mong sorkari ra·chakskana nanga ine Budbar salo, Hynniewtrep Youth Council (HYC) dabiangaha.
Budbar salo, HYC-ni dilgiparang, a·dokni Deputy Chief Minister aro Home Minister Prestone Tynsong-ko grongeani ja·man kobor ra·timgipa manderang baksa agangrikengon, Meghalaya a·dokna ma·mong sorkari ILP-ko on·na sikjaengani gimin MRSSAB-ko ra·chakskachina sorkario dabiangaha ine parakataha.
HYC-ni president Roy Kupar Synrem-ni parakatani gitade, MRSSAB-ko Home Affairs Ministry-ni a·dok sorkarina watpilatani gimin Deputy CM-o sing·sandion, MRSSAB-ko watpilatani gimin Home Affairs Ministry-ni Meghalaya sorkarina seatgipa chittini bidingo chanchirimna gita bakan sorkari, a·dokni dingtang dingtang dolrangko okamatgen ine Deputy CM, uamangna ku·rachakaniko on·ataha.
“MRSSAB-ko nipiltaichina gita Meghalaya sorkarina ge·etaniko on·e Home Affairs Ministry, ia Bill-ko a·dok sorkariona watpilataha ine Deputy CM, chingna aganaha. Home Affairs Ministry-ni seatgipa chittini bidingo a·dok sorkarina ku·pattianirangko on·na man·na gita ia chittini copy-ko chingnaba on·atchina chinga Deputy CM-ko didiaha,” ine Synrem aganaha.
HYC president-ni parakatani gitade, Meghalaya a·dokni dingtang dingtang biaprango entry aro exit point-rangko songanichi a·dokona re·baenggipa manderang neng·nikanirangko man·gen inesa Home Affairs Ministry, ia MRSSAB-ni mitam niamrangko nipiltaichina gita a·dok sorkariko didiataha ine Deputy CM, uamangna talataniko on·ataha.
“MHA-ni seatgipa chittini bidingo chanchirimna gita bakan sorkari, dingtang dingtang dolrangko okamgen ine Deputy CM, chingna ku·rachakaniko on·ataha aro chinga ia chittini copy-ko man·ahaosa sorkarina nanga gita ku·pattianirangko on·na man·gen,” ine Synrem aganaha.