Baghmara: South Garo Hills Baghmara-ni Nik-samso Garo Community Organization (NGCO) adita salrangna skang culvert-ko tariangani ja·man be·prua-nina Deputy Commissioner office complex-ni gisep-griko rama tarienggipa gadangni bidingo bilongen gisiko suk ong·gija sing·-doataniko dakangaha.
Apsan complex-ni gisepgriko district-ni ding-tang dingtang mongsong-gipa office-rangona ramako tariangenggipa sorkari office-rangona rama tariang-giparangoni ge·sa namja-batsranggipa ong·enga, apsan dake a·doko gimikon indakgipa a·selrang ong·-enga. Ia rama gitan district court, DC, SP aro DTO office-rang baksanaba gipin sorkari office-rangona re·anga. Complex-ni ning·o km 2-3 ramarangko tari-dapanganiko batanggimin bilsisana bate a·bachengat-aha aro iani bidingo gisiko nangjaenga, ramako tari-angani bilongen songre-giparangna bang·a ritcha chitingkilok dakgiparangni a·sel neng·nikaniko man·-enga.
Mijalni salao parakatani gitade, mijamangmang culvert drain tarigipako NGCO jaksi ote mesokataha jeon kam ka·a gadang namjani bidingo adita salrangna skangmangmang culvert tarigipa be·prue rama re·giparangna mikrakata-niko on·e donenga. Ian DTO-ni office mikkang-mangmango nosto ong·-gipa biap ong·a, ine parak-ataha. “Ia rama tarigipa quality-na chinga kusi ong·ja. Uamang nambatgijagipa kamrangko ka·angkua ong·ode chinga jripjrip dongjawa. Contractor-rang an·tangtangni man·gni-rangna chanchijachina aro namgipa ramarangko tarie matchotatchina chinga mol·mola. Chingni district-o indakgipa kam ka·ani-rangko chinga nangnikja aro ta·rake kamrangko ka·an baksa matchotat-china chinga mol·mola. Ia dabianirangna kam ka·ja ong·ode chinga jripjrip dongangjawa,” NGCO-ni dilgipa aganangaha.