U·IATTIMGIPAONI
SHILLONG: Dingtang dingtang dabianirangko sorkarini knachakjaengani gimin November 27 tarik dipet ‘indefinite strike’-ko ka·na tik ka·angani ja·man, Meghalaya a·dokni ASHA worker-rangko agangrikna gita a·dokni Health Minister Ampareen Lyngdoh okamataha.
Meghalaya a·doko Accredited Social Health Activists (ASHA) worker-rangni dabianirangko sorkari knachakjaengani gimin November 27 tarikoni ‘indefinite strike’ ba ari gri kam dontongate jingjengatna Meghalaya ASHA Workers Union (MAWU) tik ka·angahachim.
‘Indefinite strike’-ko ong·atanio executive committee-ni membor-rangsan bakko ra·angaigen ine janapatengon, ia jingjengatani ja·manoba sorkari mamingkoba aganchakjagenchimode November 28 tarik dipet a·dok gimikni ASHA worker-rangba jingjengatanio bak ra·anggen ine MAWU-ni president Mary June Myrsing parakatahachim.
Indake ong·engon, ASHA worker-rangni jingjengatanichi sanna banani kamrangko ka·anio nangchakeaniko man·engahani gimin a·dokni Health Minister Ampareen Lyngdoh, suk ong·gijaniko parakatenba, ASHA worker-rangko gronge agangrikna gita okamataha.
“Meligrikgijanirangko namatna gitade apsan asonge agangrikanichisan man·aigen. Uni gimin anga uamangko re·bae an·tangtangni nanganirangko angbaksa agangrikechina okamatenga,” ine Lyngdoh aganaha.
Sombar salo, ASHA worker-rangna dingtangmancha department-ni official-rang, seachi okamaniko on·anggen ineba ua parakataha.
ASHA worker-rangni man·gniko japrako gong 2000/-oniko gong 5000/-ona bariatchina gita MAWU dabiengachim indiba sorkari, uamangni dabianiko chu·sokate on·kujaengani gimin batanggimin salrangonin ASHA worker-rang kamrangko ka·gija jingjengattokengachim ine nikna man·a.
