U·IATTIMGIPAONI
TURA: Mongolbar salo, Meghalaya sorkarini Fisheries department, Garo Hills Region, West Garo Hills District Administration baksa nangrime, World Fishery Day baksana Aqua Fest-ko, Tura-ni Police Parade Ground-o ong·atangaha.
Ia program-ko ong·atanio, Meghalaya Assembly-ni Speaker Thomas A Sangma, mongsonggipa sokgipa ong·e jinmana aganprakangengon, na·tokni gamchatgipa ong·ani gimin aganangenba, na·tokko cha·aniara mandena namgniko ra·bana man·a ine aganangaha.
A·gilsak gimikon na·tok jile cha·aniara manderangni mongsonggipa janggi tangani chol ong·a ine janapatengon, uni giminsa na·tok jilanichi janggi tangani cholrangko man·ani gimin Fisheries department, manderangna u·iatanirangko on·na jotton ka·enga ine Sangma parakataha.
Chiringrango na·tokrangko jile rakkina kamrangko ka·engani gimin Fisheries department-ko mittelpilangengon, gopretani bosturangko jakkale na·tokrangko rim·jachina gita Assembly Speaker, jolo songdongenggipa manderangko didiataha.
Ia tom·anio West Garo Hills a·jani Additional Deputy Commissioner SR Marak-ba jinmana aganprakangengon, na·tok jilenggipa biaprango ra·gatgimin niamrangni bidingo jinmana agan-talate on·angaha.
Ia program-ko ong·atani bidingo, Fisheries department-ni Joint Director Jonathan Suchiang, jinmana talate on·angskaengon, bilsiantian ia World Fisheries Day-ko na·tok jile cha·enggipa manderangni on·gilani aro chu·sokaniko manina gita ong·atrongenga ine parakatenba, chiring chibisikrango donggipa na·tokrangko ripinge rakkina nangengani gimin aganangaha.
Iana skang, Garo Hills-o na·tok jile cha·enggipa manderangoni saksana na·tok salrurana gita Refrigerated truck bolsako Assembly Speaker-ni jakchi pakwate on·angaha aro na·tok jilanio chu·sokenggipa manderangna boksisrangkoba on·angaha.
Ia program-ko ong·atanio dongpae bakko ra·anggipa gipin manderangara, Fisheries department-ni Deputy Director Roger BR Marak, Fisheries-ni Superintendent Challang N Marak, Tura Municipal Board-ni Chairman JD Sangma aro gipinrang ong·a.