U·IATTIMGIPAONI
SHILLONG: Meghalaya a·doko opposition dolrang wagam gri ong·ahama? A·doko nangchongmotgipa kamrangni bidingo opposition dolrang, mongsongbate Congress dolni jrip donganiara opposition dolrangko wagam gri ong·a gita mesokanian ong·enga.
Meghalaya a·doko a·dok sorkarini ong·gija dakgipa kamrangna aro dakgualanirangna bang·en jaksi otanirangko nikna man·engachim indiba opposition dolrang pilakan sorkarini kosako maming ku·rang on·gija donganiko da·ororo nikskana man·engaha.
Assembly election-na skang ku·rang on·batgipa manderang, jekai Opposition dolni dilgipa Ronnie V Lyngdoh, Shillong-ni MP Vincent H Pala, Trinamool Congress (TMC)-ni Mukul Sangma, Charles Pyngrope, pilakan da·ororo a·dokni nangchongmotgipa kamrangni bidingo ku·rang on·aniko nikna man·skajaengaha.
Batanggimin somoirangode Congress aro TMC-ni dilgiparang, sorkarini ong·gija dakgipa kamrangna jegalrongachim indiba ia sal somoirangode Opposition dolrangoni Voice of the People’s Party (VPP)-ni dilgiparangsan, dingtang dingtang kamrangna aro sorkarini ong·gija dakgipa kamrangna jegalanirangko nikskana man·engaha.
Ia sal somoirango TMC-oni ku·rang on·batenggipaba TMC-ni state vice president George B Lyngdoh-san ong·skaengaha.
Ia opposition dolni dilgiparang, NPP-chi dilenggipa MDA sorkarinan nom·e on·aiahama ma da·o election sokbataiahaosa ku·rang on·taina siengama, somoi sokahaosa iako ma·sina man·aignok.