U·IATTIMGIPAONI
WILLIAMNAGAR: East Garo Hills a·jao Forest department aro A·chik Holistic Awakening Movement (AHAM) Eastern Zone-ni membor-rang, nok te·sao niam gri chimonge donenggipa bolrangko rim·na man·aha.
Koborko on·ani gitade, Budbar walni 10:30 bajimango Williamnagar Forest Range-ni official-rang, AHAM Eastern Zone-ni membor-rang baksa, Nengsila reserve gittimo donggipa saksa Pentom Momin minggipa mandeni noko niam gri chimongdame donenggipa bolrangko rim·na man·aha.
Iandake niam gri bolrangko badingatengani gimin AHAM-ni dilgiparang suk ong·gijaniko parakatengon, niam gri bolrangko badingengani a·selan buring bolgrimrangni porongrong ong·anganiko aro buring bolgrimrango donggipa do·o matrangni gimaanganiko nikna man·engaha ine parakataha.
Buring bolgrimrango donggipa bol wa·arangko an·tangtangni man·gnina chanchie skatang den·e palsrukengani a·selan ia sal somoirango ding·anirangba batrororengaha aro ringani chi, namgipa balwa aro a·salrangkoba man·jaengaha ineba AHAM Eastern Zone-ni dilgiparang parakataha.
Mikkangchi Garo Hills-o donggipa buring bolgrimrangko ripinge rakkiangkuna gita AHAM, Forest department baksa bakrime kamrangko ka·angkugen ineba AHAM Eastern Zone-ni dilgiparang parakataha.