U·IATTIMGIPAONI
TURA: Pradhan Mantri Formalisation of Micro Food Processing Entreprise (PMFME) scheme-ni lekkarangko bank official-rang ra·chakna jechakahani a·sel ia scheme-ko ra·na sikenggipa manderang neng·nikanirangko chagrongna nangtokenga ine A·chik Holistic Awakening Movemen (AHAM) matnangataha.
AHAM-ni parakatani gitade, Meghalaya a·dokni dingtang dingtang a·jarango PMFME scheme-na dorgasto galgipa bang·a manderangni bank lekkarangkon bank-rang jechakahani a·sel songni manderang neng·nikanirangko chagrongna nangtokengachim.
“Ia scheme-ko ra·na gita dorgasto galgipa bang·a manderangni bank lekkarangkon bank official-rang ra·na jechakahani a·sel neng·nikanirangko chagrongna nangtokenga. Chingni kobor man·soani gitade badiaba badiaba bank-rangode, tol·e ra·gipa manderangni bidingo toe aganenba, ia scheme-na dorgastorangko galjachina gitaba songni manderangko aganaha,” ine AHAM-ni dilgiparang parakataha.
PMFME scheme-ni bidingo talataniko on·angengon, songadam nokadamrango manderangni janggi tangani gadangko tang·doatna aro janggi tangani cholrangko on·na miksonganiosa ma·mong sorkari, ia scheme-ko micro food processing ba cha·ani tarianio bading chiwalaniko tang·doatna gitasa ra·gate on·aha ine AHAM-ni general secretary parakataha.
AHAM-ni parakatani gitade, ia scheme-ara songni nokni manderangna ra·gate on·gipa scheme-sa ong·genchimoba, ia scheme-na dorgasto galenggipa manderangni bank lekkarangkon official-rang ra·chakjaengani a·sel, ia scheme-ni namgnirangko ra·na sikenggipa manderang neng·nikanirangko man·skana nangenga.
Iani bidingo ta·raken am·sandianirangko dakenba, nanga gita ja·kurangko de·china gitaba AHAM, a·ja ge·antini district horticulture officer-rangko didiataha.