U·IATTIMGIPAONI
TURA: Changbongagipa Meghalaya Games-ko re·baenggipa 2024 bilsini January 15 tarikoni 21 tarikona Tura-o ong·atna siengani gimin ia kal·susaaniko sokachakna tarisamsoanirangko nina gita Sukrobar salo, Sports & Youth Affairs department-ni Director Isawanda Laloo, Tura-ona re·baenba dingtang dingtang department-ni official-rang baksa tom·e agangrikangaha.
Ia tom·aniko ong·atanio, West Garo Hills a·jani Deputy Commissioner Jagdish Chelani, Superintendent of Police (SP) Abraham T Sangma aro Meghalaya Games Organising Committee-ni membor-rang baksana dingtang dingtang department-ni official-rangba dongpae bak ra·angaha.
Ia tom·anio Sports & Youth Affairs department-ni Director Isawanda Laloo, tom·anio bak ra·giparangna aganprakengon, ia tom·aniko ong·atahani gimin West Garo Hills a·jani Deputy Commissioner-ko mittelpilangenba, ia Meghalaya Games-o ming 23 kal·susaanirangko ong·atenga aro ianoni ming 19 kal·susaanirangko ong·atna sienggipa kal·chakram biaprangkode tarimanaha ine parakataha. Bangki dongkuenggipa biaprangkoba ta·raken matchotatna gita krenge kamko ka·enga ineba Laloo aganaha.
Ia Meghalaya Games-ko sokachakna gita dingtang dingtang committee-rangko songahaoba pilak committee-rangan apsan nangrime kamko ka·genchimode nambate kamrangko chu·sokatna man·gen ineba ua aganaha.
Ia chang Meghalaya Games-ko ong·atanio coach aro manager-rangko man·chape sak 2900 kal·susagiparang bakko ra·na sienga ine janapatengon, ia changan batanggimin changrangona bate dal·batna gita sienga ine Laloo parakataha.