SHILLONG: Meghalaya East Jaintia Hills, Lailong-Harai-ona re·gipa Lumsh-nong-Sonapur ramao Meghalaya BSF sipairang chini salanggipa gariko changsoaha aro Sonapur-oni Mobile Check Post (MCP) party ML 04 C 133 gari nombor trak gariko neng·takataha. Chi bekrangko an·cheng ning·o chipaha aro NBCC malrang ning·o salangaha.
Gariko neng·takate MCP party namedake sandiaha unon chirangko nikaha aro uarangko rim·aha aro gari salgipabakoba uoniko nanggipa lekkarangko sandion mesokna man·jaha aro NBCC mal salgipa ong·ani ning·o gariko jakkalenga ine nikna man·aha indake ukoba rim·jolaha.
Dingtang dingtang biaprango BSF Meghalaya sandion Bangladesh-ona badingsrukatgipa lak 28-mang tangkana bata bang·a mal-bosturangko rim·aha. Rim·a man·gipa manderang-ko aro ra·sekgipa mal-bos-turangko niam gita sing·-sandianiko dakchina BSF sipairang Police Station-Umkiang-na pakwatataha.