U·IATTIMGIPAONI
Baghmara: The KVK South Garo Hills, Central Agricultural University (CAU) Imphal baksa apsan melie, Capacity building for Adoption of Technology (CAT) a·dok damsaoni damsaona songree mesok-ataniko Nov. 27 oni 30 tarikona ong·atangaha.
Ua exposure program-ko Dr Rupam Bhattacharjya dilaha, uni mongsonggipa (livestock production) KVK – SGH oni College of Veterinary Sciences, AAU, Khanapara, Assam aro Assam Livestock aro Poultry Corporation (ALPCo), Guwahati, Assam-ko NABARD, Capacity Building for Adoption of Technology (CAT)-ni ning·o jako ra·aha.
KVK, SGH-ni Principal Scientist& Head Dr Athok-pam Haribhushan-ni gita, ia program-ko ong·atani miksonganira dingtang dingtang biaprangoni re·-bae bak ra·giparangko sak-sa sakgipinrang baksa melie nangrimani ong·a aro Agriculture, Animal hus-bandra aro Fisheries-ni bidingo scientific technology-rangko jakalanichi maidake namroroatna man·-gen, uni gimin skie ra·ani ong·a, aro dingtang ding-tang research institution-ko jakale ra·ani ong·a.
AAU, Khanapara-ni College of Veterinary Science-ni, Dr. Raj Jyoti Deka aro Dr Lakhya Jyoti Borah bak ra·giparang baksa golpoaha aro dingtang dingtang noko jilgipa samsi cha·gipa aro ja·scep, wak, do·o, aro dingtang rokomni matchu jilarangni bidingo talate on·angaha, aro unbaksana-ba dingang dingtang skie on·ani model Hydroponic fodder unit, Azolla Unit aro Vermicomposting unit-ko college-o jakalchina aganaha.
Bak ra·giparangko una agreba dingting dingtang noko jilgiparangna, wak jilanio biosecurity measures aro health management ba be·enko an·sengat-na maidake scientific bosturangko jakalanichi namatna man·gen, uko skie on·angaha.
ALPCo, Assam-chi songreanganio, Dr PN Konwar (General Manager), Dr Janmoni Shyam, Dr Dibakar Baruah aro Dr. Nawab Yunush, institute-ni jako ra·anichi maidake ding-tang dingtang kamrangko dakangna man·gen, uni gimin talate on·angaha.
Bak ra·giparangna una agreba katta bichong jekai wak, do·o, do·bok aro ding-tang dingtang dokaniko maidake jakalna nangani uni giminba skie on·ang-aha. Noko maidake jila alarang (Wak, Do·o aro Do·-bok)-ko dokna nanga uko dake kae mesokangaha aro Hatchery unit (Do·o bitchi chiatani) aro meat processing unit (Be·enko raatani bewal)-koba ong·atangaha.
Bak ra·giparangna una agreba be·enrangko maidake raatna nanga uni vidoe-koba mesokangaha. Gimik gimang sak 20 game ge·e cha·giparang Asugre, Daji Badimagre, Warima, Dagalgopgre, Kansigre aro Kenichanigre songrangoni ia exposure tour-o bak ra·angtokaha.