U·IATTIMGIPAONI
SHILLONG: Meghalaya aro ma·mong sorkari baksa agangrikaniko a·bachengattaiani bidingo Hynniewtrep National Liberation Council (HNLC) bobil dolni manderang u·iatpiltaia dongkujaenga ine a·dok sorkari parakataha.
A·dokni Deputy Chief Minister Prestone Tynsong-ni parakatani gitade, da·o dipet HNLC-ni dilgiparang baksa changsasan agangrikna man·kuengachim aro ia agangrikaniko chu·sokgipa ong·atna gita sorkari, HNLC bobil dolni chubatgipa gadangni dilgiparangkon agangrikna re·bachina nangnikengachim.
“Da·o dipet sorkari baksa agangrikaniko a·bachengattaiani bidingo HNLC-ni maming u·iatanirangko man·sotaia dongkuja. Uamang maiba u·iatna nanganirang donggenchimode an·tangtangni ku·baltitimgipa Sadon Blah gitasa sorkarina u·iatna nanggen,” ine Deputy Chief Minister aganaha.
Ia bilsini June jao skanggipa changna sorkari baksa agangrikanio HNLC-ni dilgiparang, an·tangtangni gitcham case-rangko kema watchina sorkariko didiahachim ine nikna man·a. Ua somoio dolgnini gisepo mongsonggipa chanchirimanian, sorkari baksa agangrikanirangko dakangkuna skang, HNLC membor-rangni case-rangko kema watama watajawa, uasa ong·ahachim.
HNLC-ni chairman aro general secretary-ni kosako segatgimin gitcham case-rangko kema ka·jaskalde ba dolgnini gisepo ‘ceasefire’-na songgigrikjaskalde HNLC-ni dilgiparang, sorkari baksa agangrikanio bak ra·na man·jawa ine adita salrangna skangsan HNLC bobil doloni u·iatahachim.
Indake ong·engon, HNLC-ni chubata gadango donggipa dilgiparang sorkari baksa agangrikna re·bagenchimosa ia pilakni giminan agangrikna man·gen ine Deputy Chief Minister talataniko on·angskaaha.
“Ma·mong sorkari aro a·dok sorkarini ku·baltitimgipa baksa HNLC-ni dal·batgipa dilgiparang apsan asonge agangrikgenchimosa, ia pilak kamrangni giminan agangrikna man·gen,” ine Tynsong aganaha.
HNLC-ni dilgiparangna do·gako oe donenga ine janapatengon, “HNLC-ni dal·batgipa dilgiparang baksasa sorkari agangrikaniko dakna man·aigen. Ia bilsini a·bachengachibata chinga changsade HNLC baksa agangrikna man·aha aro ia kamko matchotatna nangnikenga,” ine a·dokni Deputy CM aro Home Minister Prestone Tynsong parakataha.