U·IATTIMGIPAONI
TURA: Me·chikrangni aro bi·sarangni an·seng baljokanina kamrangko ka·anio Anganwadi worker-rangna dakchakanirangko on·na gita Sukrobar salo a·dok sorkari, dingtangmancha smart phone-rangko suale on·ataha.
Anganwadi worker-rangna smart phone-rangko suale on·na gita dingtangmancha tom·bimonganiko District Administration-ni gita Tura-ni District Auditorium-o ong·atangaha aro ia tom·anio, Meghalaya Assembly-ni Speaker Thomas A Sangma, mongsonggipa sokgipa ong·e bakko ra·angaha.
Ia tom·anio Assembly-ni Speaker, jinmana aganprakangengon, manderangna an·seng baljokanirangko on·anichi Anganwadi worker-rangan songsalo mongsonggipa kamrangko ka·giparang gita ong·a aro uamangan an·o donggipa me·chikrangna aro atchidaldal bi·sarangna simsak nirokanirangko on·giparangba ong·a ine talataniko on·angaha.
Ia smart phone-rangko on·anichi Anganwadi worker-rang, an·o donggipa me·chikrang aro bi·sa bakgitchakrangko nambate nirok sandina man·gnok ineba Sangma aganaha.
Ia smart phone-rangko jakkale Anganwadi worker-rang, data-rangko chimonganio nambate kamrangko ka·na man·gnok aro nangchongmota kamrangna altubate agangrikna man·gnok ineba Assembly Speaker aganaha.
Ia tom·anio, West Garo Hills a·jani Deputy Commissioner Jagdish Chelani-ba jinmana aganprakangengon, Anganwadi worker-rangni kamrango dakchakanirangko on·na gita smart phone-rangko on·ahani gimin a·dokni Chief Minister aro Assembly Speaker-ko mittelpilangenba, Anganwadi worker-rangna smart phone-rangko on·anichi a·jao Management Information System (MIS)-ni kamrangko bilakbatatna man·gnok ine parakataha.
Ia smart phone-rangko Asanang aro Tikrikilla-ona Anganwadi worker-rangna suale on·anggen ineba DC parakataha.
Ia tom·anio dongpae bakko ra·anggipa gipin manderangara, West Garo Hills a·jani Additional Deputy Commissioner (ADC) Winje RG Momin, District Medical & Health Officer Dr B Debbarma, ICDS-ni District Program Officer CD Arengh aro gipinrang ong·a.