SHILLONG: Niam gri koela choenga aro badingenga ine High Court-ni nika baksana a·dok sorkariba raken ja·ku de·na nangenga ine NPP-chi dilenggipa MDA II coalition state BJP aganaha.
“Sorkari High court-o mingsani mingsa affidavit-ba ka·aha indake chinga High Court-na on·gimin lekkarango maming donuani dongchongmotja aro donga ong·ode indide sorkari uani gimin ja·ku de·naba nanga,” State BJP koborna agantimgipa, M Kharkrang, a·doko koelrangko niam choe palenga ine High Court-ni nike aganani gimin agan-talatskaaha.
“High Court-na agre darangba gipinde niam gri koela choenga aro palenga ine aganja gita anga nikenga uni gimin uako raken ja·ku de·na nangenga,” ua aganaha.
MDA I sal somairango bang·en cha·bok-rusianirang batroroenganio state BJP-ni ku·rang on·ako janaptaie, ‘‘Jensalo a·palona ong·kata aro sakkirang donga chingni ku·rangrangko chinga on·gen,’’ ua aganaha.
“Jensalo sakkirangko man·ja chingni ku·rangko on·a da·o chingko jaksi otgipa dongja. Saoba sakkirangko nika ong·ode uko party niangchongmotgen,” ua agandapaha.
Ia bilsini November jao East Jaintia Hills aro gipin a·jolrangona wenanggipa Justice (retired) BP Katakey-ni on·gipa 18-gipa interim report-o Meghalaya-ni High Court mikrakataniko on·aha.
A·doko niam gri koela choa aro palanirang dongja ine High Court-na on·gipa Justice retired BP Katakey-ni 18-gipa interim report-o janapaha.
Don Bosco bibra sepang National Highway 6 sambao uandake district-ni Byndihati songo St. Anthony’s College gitcham Don Bosco College ki·sangchi koela choa gitalko bang·en dane dontaiengaha ine Justice retied BP Katakey-ni u·iate 18-gipa interim report-ni bidingo salgipino knaatani sal December 11 pring 10;30 bajina skang ua uni gita aro uni talatani report-ko on·china Meghalaya High Court ru·utgija sal somaio East Jaintia Hills Superintendent of Police Jagpal Singh Dhanoa-na on·gipa ordero ge·etaha.